Shillong, Nohprah 19
Ka Board of Control for Cricket in India (BCCI) ka la pyntip sha baroh ki kynhun ïalehkai ba ka lympung ïalehkai 19th Indian Premier League (IPL) 2026 yn sdang naduh 26 tarik u Lber haduh 31 tarik u Jymmang jong u snem ban wan.
Ki bor ba dei khmih ïa ka IPL ki la dep ban pynbeit ïa ka por jong kane ka lympung hadien ba la kut ka ICC Men’s T20 World Cup. Ka jingïalehkai phainal jong ka World Cup la buh ban long ha Ahmedabad ha ka 8 tarik u Lber, kaba ailad ïa ka jingpynkhreh kaba palat ar taiew na ka bynta ki nongïalehkai jong ka ri India bad kumjuh kiba nabar ri ban ïasoh sha ki kynhun.
Ha kaba ïadei bad ki jingtip ba bniah jong ka IPL, kynthup ïa ki jaka bad ki prokram ïalehkai, yn sa pynbna hadien.
Ha kane ka jingpynbna, la pynthikna ruh sha ki kynhun ïalehkai ba baroh ki nongïalehkai ba la soi ha ka ïew ïathied rangïalehkai ha ka sngi Ba-ar kin ïadon bynta ha ka IPL, khlem da kheiñ ïa ki kalendar jong ki ha ka pyrthei. Kane ka jingpynshai ka la long kaba kongsan bha na ka bynta ki kynhun kiba buddien ïa ka jingdon jong ki nongïalehkai nabar ri wat hapdeng ka jingdon ki prokram ïalehkai bar ri.
Ka Sri Lanka bad ka Bangladesh ki dei tang ki ar tylli ki ri kiba don ïa ki jingïateh kular hapdeng ki ri kiba ïatyngkhuh bad ka IPL. Hynrei na ka liang ka Board of Control for Cricket in India (BCCI) ka la ïoh ïa ka jingpynthikna na baroh ar tylli ki synjuk ïalehkai kriket jong kitei ki ri ba ïa ki nongïalehkai ki ban shim bynta ha ka IPL yn ailad ïa ki na ka bynta kane ka lympung ïalehkai. Ka jingpynskhem ka plie lad ïa ki kynhun ïalehkai na ka bynta ka ïew ïathied nongïalehkai.
