Shillong, Nohprah 19:
Ka jingeh kaba ki paidbah ki la mad palat laiphew phra snem kiba shong ba sah hajan ka Wahumkhrah mynta kin sa ïoh ban mad ïa ka surok, namar ka tnad PWD jong ka Sorkar Jylla kan sdang ban shna noh ha ka bynta kaba nyngkong ha ka jingjrong kaba 63 meter.
Mynta ka sngi u MLA ka North Shillong Constituency u Bah Adelbert Nongrum ryngkat ki engineer jong ka PWD bad ki nongkitkam ka Jaiaw Block Committee ki la leit ban jurip ïa ka jaka ban shna ïa ka surok kaba don ha Jaiaw Laitdom ka ban mih shaduh jingkieng ha Jaiaw Umpohliew kaba la tip kum ka jingkieng bret suloi.
Haba ïakren bad u Bah Adelbert Nongrum u la ai khublei ïa u Symbud Myntri Rangbah ka Jylla u Bah Prestone Tynsong uba peit ïa ka tnad PWD uba la pynurlong ïa kane ka jingkwah ki nongshong shnong namar ha ka bynta ba nyngkong ka Sorkar ka la mang T.1.3 Klur lyngba ka PWD Scheme. U la ong ba kane ka surok kan ai jingmyntoi bad ka jingkyrkhu kaba khraw ïa ki nongshong shnong khamtam ha ka pang ka shitom.
U la pynkynmaw ba kane ka surok ka dei kaba la angnud la palat 38 snem naduh ka por ba long MLA u Bah AH Scott, nangta ka por u Bah Paul Lyngdoh bad Kong Roshan Warjri, kumta u don ka jingngeit, haba don ka jingsdang don ruh ka jingbteng.
U la ong biang ba donkam ïa ka jingbuddien, ka jingïaishah bad ïaineh khnang ban pyndep ïa ka jingangnud jong ki paidbah ïa ka surok.
Shuh shuh u la ong biang ba kane ka surok kan long ka jingkyrkhu kaba khraw, ba ka kali Municipal kan ïoh ban lum ïa ki ñuit, nangta kan pyllait na ka jingjia ba sngewsih kiba jia kyrkieh kum ha ka pang ka shitom bad ka jingjia ha jinglynshop ka mariang.
U Bah SB Kharbangar uba dei u Rangbah shnong Jaiaw Laitdom bad u Bah Pollan Sohphoh u trai ka jaka kiba la ïa don lang ha kane ka sngi, ki la pynpaw ka jingsngewnguh ïa u MLA u ba la pynurlong ïa ka jingthrang ki paidbah kaba naduh u snem 1987 bad mynta ka la dap 38 snem bad dei lyngba ka jingbuddien u Bah Adelbert Nongrum la pynurlong ïa ka jingthrang jong ki paidbah.
