Shillong, Nohprah 19
Ki khlieh nongsynshar ha ki shnong bapher-bapher ka Hima Sohra ha ka 19 tarik u Nohprah 2025, ki la leit ban ïakynduh u Bah Winston Tony Lyngdoh, Chief Executive Member ka KHADC bad u Bah Denzil R Chen, Executive Member ba dei peit ïa ka tnad Elaka halor ka jingbym pat ïoh jingithuh pura ha ka dur ka Sanad ïa u Syiem Thymmai, u Pa’iem Marremdor Syiem, ba la pynskhem da ka Dorbar Hima Sohra na ka Khasi Hills Autonomous District Council (KHADC).
Ka jingbym pat ïoh jingithuh pura ïa u Syiem ba thymmai ka Hima Sohra ka la ïatyngkhuh jingeh ïa ki khlieh nongsynshar ha ki shnong bapher-bapher jong ka Hima Sohra.
Kum ban shu kdew hangne, ba u Pa’iem Marremdor Syiem uba la shah pynskhem kum u Syiem ba thymmai ka Hima Sohra myn ha ka 03 tarik u Naiwieng, 2025, u la pyndep ïa ka jingthang pynkhuid ïa kaba sah u Syiem ba la khlad noh, kata u Pa’iem Freeman Sing Syiem ha ka 05 tarik u Naiwieng, 2025.
Haba kren sha ki lad pathai khubor, u Bah Wellborn Bynnud, Executive Member ka Dorbar Shnong Pdengshong, Hima Sohra, u la ong ba u CEM ryngkat u Executive Member, ki la kular ban pynkloi ïa kane kam bad ki dang peit bniah ïa ki kyndon baroh.
Shuh shuh, u la ong ba ki khlieh nongsynshar na ki shnong ka Hima Sohra ki donkam ïa ki Sanad na u Syiem ban pynïaid ïa ki kam shnong kam thaw bad don ruh kiba hap ban pynthymmai bad kumta ki donkam ban ïoh ïa ka bor na u Syiem.
U la ong ruh ba ki khlieh nongsynshar na ki shnong ka Hima Sohra ki dang ap ïa ka KHADC ban pyndep kloi ïa kane ka kam, khnang ban pynsuk ïa ka rukom treikam ka Hima ha ki liang baroh.
