Srinagar, Nohprah:
Ki pulit jong ka Jammu & Kashmir, ki la pynbna ïa ki 29 ngut ki nongtrei jong ka jaka pynmih bording, da kaba kynnoh ba ki don ka jingïadei bad ki lehnoh bad ki kynhun runar.
Ka NDTV ka la ïoh ïa ka shithi kaba batai bniah ïa ki jinglap jong ka kaiphod pynshisha jong ki nongtrei ha Ratle Hydroelectric Project, ka jaka pynmih bording kaba heh kaba 850 megawatt (MW) kaba dang shna ha ka wah Chenab ha Drabshalla. Ka kaiphod ka jer kyrteng ïa ki briew shimet kiba don ïa ka jinglong runar bad ki jingïadei.
Kane ka shithi kaba la thoh ha ka 1 tarik u Naiwieng, la soi da u Senior Superintendent of Police (SSP) Kishtwar u Naresh Singh bad kane ka shithi ka la thoh sha u General Manager ka Mega Pvt Ltd Hydro Electric Project (HEP) u Rattle Drabshalla.
La lap ba ki nongtrei ki donkti ha ki “kam pynkhihwin bad ki kam pyrshah ri,” la ong ka shithi.
U SSP Kishtwar u la pynpaw ïa ka jingsngewkhia ba ka projek pynmih bording, namar ba ka long kaba donkam ha ka buit treikam bad ha ka ri, ka dang long ka thong kaba don jingma bha na ka bynta ki ri nongshun. Ka jingpynrung ïa ki nongtrei kiba don jingïadei bad ki kam lehnoh ne kiba don ka jinglong runar ka pynthut ïa ka jingshngaiñ jong ka projek bording.
“Ka donkam ban pyrkhat biang ïa ka jingpynrung kam ïa kum kine ki nongtrei kiba don ka jingïadei bad ki kam lehnoh/ka jinglong runar namar kine ki nongtrei ki lah ban leh ïa kano kano ka kam bad buh jingma ïa ka projek. Ka donkam ban peitngor bha ïa ki kam jong kum kine ki nongtrei,” la ong u SSP.
