Shillong, Nohprah 19:
U Myntri Rangbah ka Jylla u Conrad K. Sangma u la ong ba ka Sorkar kan nym shah ïa ki kam be-aiñ jong ka Hynñiewtrep National Liberation Council (HNLC) hadien ka jingshah pynbthei bom IED ha ka kompeni Dhar ha Shymplong, East Jaiñtia Hills district.
Kane ka jingpynpaw u Conrad K Sangma ka dei namar ka seng HNLC ka la shim ïa ka jingkitkhlieh halor katei ka jingbthei bom IED da kaba kam ba ka la thmu ïa ka jaka jong u Bah Sniawbhalang Dhar, u Symbud Myntri Rangbah ka Jylla, halor ka jingkyntait ban ai pisa.
Haba la twad jingmut na u, halor katei ka jingjia ba katno ngut ki riew saiñ pyrthei ha Meghalaya ki shah dawa pisa, u Conrad u la ong, ka jingtip ba bniah um don bad u, hynrei kham mynshwa kane ka seng ka ong ba u siew bad mynta ki ong ba um siew shuh- kata ka long kaba pynkulmar jingmut, u la ong.
U la pynthikna ba ka Sorkar kan nym shah ïa kum kine ki jingthombor bad ki pulit ki la lum ïa ki sabut kiba biang ban leh eiei.
“Ki pulit ki la pynlong ïa ka jingwad bniah kaba khlaiñ bha, namar ki la ïoh ïa ki jingtip kiba biang bad ki sakhi kiba pura. Nga thikna ba u Superintendent of Police un sa ai jingtip sha ki lad pathai khubor namar ki pulit ki la pynlong ka jingtohkit kaba sted bha ban kem ïa kiba donkti sha lyndet,” la ong u Conrad.
Kum ban shu pynkynmaw, ka kyrwoh jong ka seng HNLC, kaba la pyllait da u General Secretary u Bah Sainkupar Nongtraw, ka kam ba katei ka kynhun ka la thombor ïa ki mar ki mata jong u Symbud Myntri Rangbah u Bah Sniawbhalang Dhar hadien ba la kynnoh ba u la kyntait ban pynbiang ïa ki jingdawa dawa pisa jong ka seng.
Ki pulit ki la pynthikna ba ar ngut ki nongïarap jong ka HNLC ki la shah kem ha ka 18 tarik mynta u bnai ha kaba ïadei bad katei ka jingbthei bad ki la kam ba ki la la pynjulor ïa kitei ki tiar.
