Shillong, Nohprah 19
Kumba ju leh man la u snem, shuwa ban poi ka sngi leh kmen Khristmas, ka Junior Christan Endeavour Society (JCES) jong ka Balang Presbyterian Mawkhar ha ka 19 tarik u Nohprah 2025, ka la pynlong ïa ka Khristmas Carol.
Ïa kane ka Khristmas Carol ki la sdang ban ïaid paidbah na Ïingmane ter-ter sha YMCA, Motphran, Bimola, bad pynkut sha Ïingdorbar Mission Compound.
La sakhi ba ki paidbah ka Balang, ba kynthup naduh ki longkmie ki longkpa, ki samla haduh ki hep kiba rit ki la ïa shimbynta shitrhem ha kane ka sngi.
Ban pynitynnad shuh shuh ïa ka jingïaid Carol, la sakhi ïa ka jingpynsawa ïa ki jingrwai jingtem ryngkat bad ka jingshad kmen jong ki samla bad ki khynnah haduh kiba la rangbah ruh.
Kum ban shu kdew hangne ka sngi lehkmen Khristmas ki Khristan ka dei man la u snem ha ka 25 tarik u bnai Nohprah (December).
Ha kine ki taïew baroh ki Balang Khristan ki ju pynlong ïa ka jingïaid Carol kum shi bynta ban rakhe lehkmen shuwa ban poi ka sngi Khristmas.
