Shillong, Nohprah 21
Ban wanrah ïa ka jingïajan hapdeng ki kynhun Balang kiba don hapoh ka shnong Mawroh, ka Dorbar Shnong ka la pynlong da ka jingrakhe Pre-Christmas ha Madan Basketball Court ha ka sngi Saitjaiñ.
Ha kane ka jingrakhe ban pynkhreh ïa ka jingwan long briew u jisu Khrist ki longkmie longkpa, ki khun samla, ki khun hep ki ba rit na ki kynhun Balang bapher-bapher kiba don hapoh ka shnong Mawroh ki la wan ban ïashim bynta shitrhem ha kaba ïa rwai, ïa shad bad ban sngap ïa ka ktien jong u Blei kumjuh ruh ha ka jingduwailang ban pynkhreh ïa ka jingwan long briew u khun jong u Blei.
U Fr Petter Nengnong haba sam ïa ka ktien jong u Blei ha kane ka janmit u la pynpaw ka jingsngewkmen kaba khraw ban ïoh ban ïadonlang hapdeng ki kynhun Balang bapher-bapher ban pynkhreh ïa ka jingwan long briew u khun u Blei bad pynpaw ba ka long ka jingitynnad, da kaba u la pynsyriem ïa u khiew syntiew ba mih da bun jait ki syntiew bad phuh ha la ki rong ki rong ban pynitynnad bad ong ba ka long ka jingkmen kaba khraw ïa ka shnong baroh kawei.
“Ka Khristmas ka dei ka jingkynmaw ïa ka jingkha ïa u Trai jong ngi U Jisu Khrist, La kha ïa u ha ‘Bethlehem’ kaba mut ha ka ktien ‘Hebru’ ka ïing jong u kpu, namar ba hangta ha kane ka shnong la kha ïa uta u ban sa ong hadien 33 snem, nga long u kpu jong ka jingim.” La ong u Fr Nengnong.
U Fr Nengnong u la kyntu ïa ki khun samla ban im ka jingim ba bha bad ïaid ha ka lynti ka ba dei, namar kine ki sngi ki dei ki ba eh bad kiba tan bad ban kyiar na ki jingsniew jong kane ka juk ba don mynta, u la ong “Lada ngi leh ïa ki kam kiba bha, ngin ïohkheit ruh ïa u soh u ba bha.”
