Ampati, Nohprah 21
Ki pulit ka South West Garo Hills (SWGH) ha ka Sngi Thohdieng ki la kem noh ïa arngut ki briew ha ka jingkhynra kaba la ïalam sha ka jingshah kem jong arngut ki briew na ka shnong khappud jong ka Mahendraganj.
Kane ka jingkhynra ka long katkum ka jingtip na ki nongshong shnong jong ka shnong Jangari kaba hap hapoh Kalaichar Police Post bad la ïalam da ka kynhun jong ka Anti Narcotics Task Force (ANTF) napoh ka distrik.
Kitei ki arngut kiba la shah kem ha katei ka jingkhynra ki dei kiba la tip kyrteng kum u Faruk Sheikh (48 snem ka rta) na Nandirchar, Mahendraganj bad u Md. Bolurudin Bepari (19 snem ka rta) na Beparipara, Mahendraganj.
Ha kane ka jingkhynra, ka kynhun ANTF ka la ïoh kurup ruh ïa u suba jingdih ba dei u kynja uba khia 1.666 kilo, na u Faruk Sheikh.
Haba ïadei bad kane ka jingjia, la pynngat mukotduma bad ki pulit ka distrik, da kaba pyntip ba yn dang pynlong shuh ïa ka jingtohkit ban pyntikna ïa ka tynrai bad ka kynhun kaba donkti ha ka jingkhaïi be-aiñ ïa ki jingdih pynbuaid.
