Shillong, Nohprah 21
Ka Seng Samla Pynthorumkhrah Parish, St. Peter & Paul, ha ka sngi u Blei ka la pynhiar ïa ka lama jong ka jingrakhe dap 50 snem lane Jublili Ksiar jong ka bad ïa ka 12th Convention.
La sdang ïa Seng Samla naduh u snem 1975 bad ha kine ki snem ki jingïaid lynti jong ka pyni ïa ka jingkiew bad jingroi kaba la wanrah shibun ki jingkylla, ki jingkiew shaphrang bad ki jingtynjuh ruh katkum ka jingïaid ka juk, hynrei ka jingshimkhia bad ka jingskhem nongrim ki nongïalam naduh ba la seng haduh mynta ka la pynwandur ïa ka seng.
La ong ba ha ki snem 1975, 1980 bad 1990, ka Seng Samla ka la sakhi ïa ka jingkiew suki lyngba ka jingwan pynïasoh ki samla kiba la don ka jingnang jingstad bad kiba don ïa ka jingkitkhlieh ban pynkhlaiñ ïa ka jinglong nongïalam bad ban tei ïa ka seng hapoh ka Parish bad ha ka imlang sahlang.
Ha kane sngi pynkut ïa ka jubili la sdang ïa ka prokram da ka Holy Mass kaba la pynïaid da u Most Rev. Bernard Laloo, Bishop jong ka Diocese of Shillong, ha ryngkat ka jingdonlang u Parish Priest u Fr. Lawrence L. Nongkseh bad u Fr. Festus Shadap uba long u Assistant Parish Priest.
U Bishop Bernard Laloo u la kyntu ïa ki samla ba kin im ïa ka jingim bakhuid bad ban long kiba la pynkhreh bad pynkynmaw ba dei ban ïakhun pyrshah ïa ki bor jong ka jingsniew, kiba pyrshang ban pynjot ïa ka jingim ki samla, u la pynshlur ruh ïa ki samla ba kin heh kin san da kaba ïa jan bad u Trai Jisu Khrist, ban tei ïa ka jingïatylli bad ka jinglong kawei ha ka jingngeit.
La pyllait paidbah ïa ka Souvenir Golden Jubilee da u Bishop Bernard Laloo ha ka jingdonlang u MLA ka Pynthorumkhrah Constituency u Bah A.L. Hek bad ka Seng Samla ka la pynkup burom ruh ïa ki nongïalam barim kiba la noh synniang ïa ka seng, ba kynthup ïa ka Kong Uni Mary Kharkongor kaba la thaw ïa ka Anthem jong ka Seng Samla bad u Bah Dominik K. Lanong, uba la thaw ïa ka riti treikam ka seng.
La pynhiar ïa ka lama jong ka jingrakhe jubili da u U Fr. Festus Shadap ha ka jingiadon lang u Bah AL Hek.
