Shillong, Nohprah 21
Ka Combine XI na Laban Pyllun ka la long ka lahduh ha ka lympung ïalehkai 3rd Maitshaphrang Khasi League T20 Cricket Tournament 2025 ba la pynïaid da ka Khasi Student Union (KSU), hadien ba ka la pynliem noh ïa ka Rangkynsai Cricket Club.
Ïa ka nam Player of the Series ha kane ka lympung la ïoh rah da u Shavian P. Blah na ka Rangkynsai Cricket Club, uba la lah ban kamai 318 run bad khur 8 wiket, katba ïa ka nam Man of the Match la ïoh da u Erich Lyngdoh uba la lah ban kamai 38 run bad 1 wiket.
Kiwei pat ki rangïalehkai kiba la lah ban khur ïa ki khusnam ha kane ka lympung ki long u Nathaniel Pyngrope na ka Donkins Cricket Club, uba la ïoh ïa ka nam Best Under-19 hadien ba u la ïoh ban khur 5 wiket.
U Shavian uba la khur ïa ka nam Best Under-23 da ka jinglah ban ioh kamai 318 run bad khur 8 wiket, u la khur ïa ka nam Highest Run Scorer, katba u Charm Marbaniang na ka Rangkynsai Cricket Club u la ïoh ïa ka nam Highest Wicket Taker da kaba khur haduh 15 wiket.
Ïa ki khusnam sha ka kynhun lahduh bad sha ki rangïalehkai la sam da u Myntri ka tnat ïalehkai u Bah Wailadmiki Shylla kum u kongsan ha ryngkat ka jingsakhi lang jong ki nongïalam ka seng KSU, ki nongkitkam jong ka Meghalaya Cricket Association bad ka Shillong Cricket Association kynthup ruh ki rangbah shnong na ki shnong kiba don hapoh ka jylli jong ka sor Shillong.
