Nongstoiñ, Nohprah 21
Ka Domsohshan – Nongkasen Sports Club ha ka sngi Saitjaiñ ka la pynhap pyrda noh ïa ka lympung ïalehkai 1st Open To All Knockout Tournament 2025 ha kaba ka kynhun ïalehkai jong ka Nongkasen SC ka la long ka lahduh.
Ïa kane ka lympung la wan pynhap pyrda da u Bah Sharailang Warjri, State NPYF Secretary kum u kongsan ryngkat ka jingïasynran u Bah Damian Marshiangbai, Sordar shnong ka shnong ka Domsohshan – Nongkasen, Bah Edelbert Rani President ka Domsohshan-Nongkasen Sports Club, Bah Mykin Marngar Secretary ka Domsohshan – Nongkasen Sports club bad kiwei kiwei.
Haba phai sha katei ka sngi pynkut ïa katei ka lympung, ka jingioh rah nam lahduh ka Nongkasen ka la wan hadien ba ka la lah ban pynliem noh da 5-3 kol ïa ka Raplang FC lyngba ka tie-breaker hadien ka jingïakhaid.
Ïa ka nam Best Player la rah da u Meban Thabah na ka Nongkasen Sports Club bad ka Nongkasen SC kum ka lahduh ka la ïohpdiang ïa ka song pisa kaba T.20 hajar tyngka ryngkat ka trophy, katba ka Raplang FC ka la ïoh T.10 hajar tyngka.
