Nongpoh, Nohprah 21
Da ki spah ngut ki paidbah nongleit nongwan ha ka surokbah National Highway 6 kila hiar na la ki kali ban tam ïa ki dohkha kiba la hap hapdeng jong ka surokbah ha ki thaiñ 19 Mer, Ri Bhoi District.
Katei ka jingmuja bad shongshit tam dohkha jong ki paidbah ka dei hadien ba kawei ka kali kit dohkha kaba don ïa u registration number ML10-D-2739 (Mahindra Pick-up) katba ka dang hiar sha ki thaiñ Byrnihat na nongbah Shillong, kala kylla lyndang bad pynlong ïa ki dohkha ba kin hap bad shlei ha ka surokbah.
Katkum ka tyllong khubor, la ïathuh ba katei kala jia ha ka por kumba 1:30 baje eiei ha ka janmiet jong ka Sngi U Blei bad ka daw tynrai jong katei ka jingjia ym pat lap satia ban tip, hynrei la ïoh jingtip pat ba u nongñiah katei ka kali u la lait thaw na ki jingmynsaw.
Kane ka jingjia kala wanrah ruh ïa ka jingdheng kali ba shipor ha katei ka surokbah na ka daw jong ka jingsangeh bad hiar ki paidbah ban tam ïa ki dohkha kiba la hap bad shlei hapdeng ka surokbah.
