Bengaluru, Nohprah:
U Symbud Myntri Rangbah jong ka Karnataka u DK Shivakumar, u la kam hangne ha ka sngi saitjaiñ ba ka kynhun jong ki heh nongïalam jong ka seng Congress, ka la ai katto katne ka khubor sha baroh arngut, u Myntri Rangbah ka Jylla, u Siddaramaiah bad ïa u, ha kaba ïadei bad ka jingïasam bor, bad pynbna ba baroh arngut, kin leit lang sha New Delhi, ynda la khot ïa ki ban ïakren ban pynbeit ïa ka jingeh ha ka jingkylla nongïalam.
“Ngan pyntip ïa phi (ki lad pathai khubor) bad ngan ym leh khlem ka jingpyntip jong phi.
Ngan ym leit rieh satia. Ki la phone ïa ngi baroh arngut lyngba ka phone bad ki la ïathuh ïa ngi ïa kaei kaei. Kin sa ïathuh ïa ngi lano ban leit jngoh ïa ki. Da kaba tikna ngin sa leit, hato ngi lah ban rai ban ym leit,” u la buh jingkylli haba ki nongthoh khubor ki la kylli hato un leit ban ïakynduh ïa ki nongïalam ba hakhliehduh ha Delhi.
Halor ki Naga Sadhu kiba kyrkhu ïa u, u la ong, “Ki la wan phai sha ïing bad ki la kyrkhu ïa nga. Ngim lah ban ong em ïa ki briew kiba wan sha ïing. Ha ka saiñ pyrthei, ka long kaba shong tynrai ba ki riewstad, ki riewkhuid, ki nongsakhi bad ki rangbah kin kyrkhu ïa ngi.”
U Shivakumar u la ong ba un leit sha Delhi ha ka sngi Ba-ar ban ïakynduh ïa ka kynhun Economimc Offences Wing jong ki pulit ka Delhi ha ka jubab ïa ka jingpynbna ba la pynpoi sha u ha ka mukotduma jong ka National Herald.
U Shivakumar u la ong ba ynda u la don ha Delhi, un leit ruh ha ka jingïalang halor ka projek ban pynïasoh ïa ka wah kaba la khot da ka Union Jal Shakti Ministry. “Ngan ïakren ruh halor ki projek pyntuid um ba kongsan jong ka jylla jong ngi, kum ka Mahadayi, Upper Krishna, Mekedatu bad Upper Bhadra. Nga la wad por ban ïakynduh ïa u Myntri ka sorkar pdeng uba dei khmih ïa ka tnat Environment bad u Myntri ka tnat pynroi sor ruh kumjuh.
“Ïa ka mukotduma jong ka Directorate of Enforcement la weng noh da ka ïingbishar ha ka mukotduma National Herald, tang kawei ka ejahar kaba dang sahteng, ngi ïakhih ban ïathuh sha ka pyrthei kumno ngi shah pyndik,” u la bynrap.
Nga dang ïakynduh ïa ki baroh ban ïada ïa ka jingmyntoi jong ka jylla. Nga don ki jingthmu ban ïakynduh ïa ki MP jong ka jylla bad nangta ban khot ïa u Myntri Rangbahduh ryngkat bad ki lada ka por ka ailad”, la kyrmen u Shivakumar uba dei ruh u President ka Congress ka jylla.
