Khliehriat, Nohprah 21
Ka Byndihati ka la khur ïa ka nam lahduh ha ka lympung ïalehkai ki kynthei ba tip kum ka Women Football Tournament 2025 ba la pynïaid da ka East Jaiñtia Hills District Football Association (EJHDFA), hadien ba ka la lah ban pynliem noh ïa ka Dkhiah West lyngba ka tie-breaker da 4-3 kol ha ka jingïakhun final kaba la long ha ka sngi Saitjaiñ ha madan artificial turf Diengshyn-rum, Khliehriat.
Ka jingïakhun haduh kaba kut jong ka por ba la buh hapdeng kine ki arliang mamla ki la ïakhaid khlem don ba lah ban thep kol bad wat haduh ba la pynïakhun sa ïa ka extra time.
Hadien ba la kut ka jingïalehkai la sam ïa ki syrnod bad ki trophy sha ka lahduh bad kynhun ba-ar da u Working president EJHDFA u Bah Mehiwot Shadap bad u General Secretary Bah James Sutnga nalor ki dkhot nongkitkam ka Youth Development Committee.
La sam ruh ïa ki khusnam shimet, ha kaba ïa ka nam Best Player la ïohpdiang da ka Makrisha Songthiang, ka nam Best Goalkeeper ka leit sha ka Priyanka Latam. Baroh arngut ki dei ki ‘thei ïalehkai ka Byndihati SC.
