Nongpoh, Nohprah 21
Ki pulit ka Ri Bhoi hapoh ka jingïalam jong u Senior Superintendent of Police, u Vievekand Singh Rathore ha ka janmiet sngi Thohdieng, ki la pynlong ïa ka jingrakhe lypa ïa ka jingwan long briew jong u Jisu Khrist sha ka pyrthei kaba la ju tip kum kata ka Khristmas bad ban pdiang ïa ka snem thymmai ba suk ba kmen.
Kaei kaba kham long kyrpang ha kane ka jingrakhe kaba la pynlong ha phyllaw ka ophis treikam u SP ka Ri Bhoi ha Nongpoh, ka dei ka jingïadon ryngkat ruh da ki khunswet kynthei bad shynrang kiba la ri bad sumar da ka tnad Social Welfare ka District.
Ha katei ka janmiet, la wan ruh ban ïadon ryngkat da u Bah Paul Lyngdoh, Myntri barim ka jylla, u Abhilash Baranwal Deputy Commissioner ka Ri Bhoi, u Bah Bipul Thangkhiew President ka RBYF, Bah Ferdynald Kharkamni President ka KSU NKHD nalor kiwei kiwei ki heh ophsiar na ka District lem bad ki heh pulit na ka District hi baroh kawei.
Haba ai jingkren ha kane ka sngi, u Bah Paul Lyngdoh u la ai ka jingïaroh ïa ki pulit ka Ri Bhoi kiba la lah ban pynlong ïa kane ka jingrakhe Khristmas lypa lem bad ban pdiang ïa u snem thymmai uba suk ba kmen ryngkat lang bad ki khunswet kiba la ri la sumar da ka tnad Social Welfare.
U Bah Paul Lyngdoh u la ai mynsiem ruh ïa ki pulit ka Ri Bhoi halor ka jingtrei shitom ka jong ki ban pynduh jait ïa ki kam sniew ha ka imlang ka sahlang bad ruh ban pynneh ïa ka shongsuk shongsaiñ khamtam ha kaba ïadei bad ka jingïakhun pyrshah ïa ki kam pynkheiñ aiñ ñiah kali kaba la pynduna shikatdei ïa ki jingjia ïa tyngkhuh kali.
Ha kane ka janmiet, u Bah Paul Lyngdoh u la shim ruh ïa ka kabu ban ai khublei Khristmas kaba dap da ki jingkyrkhu kyrhai bad ban pdiang ïa u snem thymmai uba pahuh pahai ïa ki paidbah ka Ri Bhoi bad ka jylla hi baroh kawei.
