Mumbai, Nohprah:
Kum ka jingïakynduh jingeh kaba khraw ïa u Maha Vikas Aghadi, ka seng Congress ha ka sngi Saitjaiñ ka la pynbna ban ïakhun ïa ka kynhun kaba heh tam ha Asia, tang marwei ha ka ilekshon jong ka Brihanmumbai Municipal Corporation (BMC).
Ka jingthep vote na ka bynta ka ilekshon jong ka BMC bad kiwei pat ki 28 tylli ki Municipal Corporation la buh ban long ha ka 15 tarik u Kyllalyngkot, jong u snem ban sa wan.
Ka Maharashtra bad ka Mumbai Congress kaba dei peit, bad u heh nongïalam jong ka Observer u Ramesh Chennithala u la pynlong ïa ka jingïalang ban bishar bniah, ha kaba ïa ka rai ban ïakhun marwei ïa ka ilekshon BMC la shim da kawei ka sur.
U Chennithala u la ong ba ka Congress kan ïakhun ha ka ilekshon BMC pyrshah ïa ka BJP bad ka Shiv Sena ba ïalam da u Uddhav Thackeray ruh kumjuh. U la ong ba ki seng kiba don ïa ka jingmut jingpyrkhat niam bad kaba ïaid shaphrang ki dei ban ïatylli lang ban pynim ia ka Riti synshar ka ri.
“Ngin pynkhreh ïa ka mat treikam jong ngi bad ngin rah hakhmat ki paidbah, ngi kyrpad ïa ki paidbah ka Mumbai ba ki dei ban ailad ïa ngi ban pynïaid ïa ka BMC, ngin pynïaid ha ka rukom kaba kham bha”, la ong u Chennithala.
Kane ka ilekshon, kan long hadien ba ka Supreme Court jong ka Ri India, ka la ong ïa ka State Election Commission, ba kan pynïaid ïa kane ka ilekshon, namar ba ka la sahkut mynta la saw snem.
“Ngi sngewnguh ïa ka Supreme Court ïa ki hukum jong ka. Lym kumta ka sorkar jylla ka la synshar beit beit ïa baroh ki Municipal Corporation bad ka la pyndonkam bakla ïa ki lyngba ki kam bamsap bad ki kam thok. Dei ban sangeh noh mynta. Ki briew ki kwah ïa ka jingsynshar kaba khuid bad kaba hok. Bad kane ka dei ka por kaba biang ban bret ia kine ki briew kiba bamsap.”
U Chennithala u la kynnoh ba ka Maharashtra ka la kylla long kawei na ki jylla ba bamsap tam. U la kynnoh ba ha ki jingthep vote jong ki Local Body, ki briew ki la sakhi haduh katno ka pisa la pyndonkam ban pynngop ïa ki nongthep vote.
“Ka don ka jingbamsap kaba khraw ha man la ki projek bad ki jingpynroi. Khlem da siew hapoh ka miej, ym don ei ei kaba ïaid shaphrang ha Maharashtra. Kane ka dei ka jinglehbeiñ ïa ka synshar paidbah bad ka jingpynhiar dor ïa ka Riti Synshar. Ka BJP bad ki paralok ba ïatreilang jong ka kin pyndonkam ïa kijuh ki buit ha ki ilekshon BMC, hynrei ngi ngeit skhem ba ki briew jong ka Mumbai kin kyntait ïa ka bamsap jong ka BJP bad ban thep vote katkum ka jingkwah jong ka seng Congress. Ka seng kaba bat ïa ka jingsynshar ka la dawa pisa. Ka kyntien bamsap ka la don ha ka jaka jong ka ktien dawa pisa mynta ha Maharashtra,” u la kynnoh.
