Shillong, Nohprah 22
Kawei ka jingjia ba sngewtriem ha kaba u wei u rangbah ba la 42 snem ka rta, ba la tip kyrteng kum u Bah Shempung Mangu la duh noh ïa la ka jong ka jingim hadien ba u la shah bom shah tied ha ki riew thrang snam ha surok thymmai hajan ka ‘toll gate’ ha Mawkhanu.
Haba ïadei bad kane ka jingjia, na ka liang ki bahaïing hasem ha ka 22 tarik u Nohprah 2025, ki la leit ban ujor da ka ejahar ha Diengpasoh Police Station.
Haba ïakren sha ki lad pathai khubor, u Kñi jong u ne u rangbah, kata u Bah Thimaia Mangu u la ïathuh ba kane ka jingjia ka dei ha ka 20 tarik mynta u bnai ha ka por 11 baje mynmiet bad une u rangbah u la khlad noh ha ka por 3 baje, na ka daw jong ka jingktah ha ka jingshah bom shah shoh.
Na ka liang u Bah Phestar Mangu uba dei ruh u Kñi jong u ne u rangbah u la ong une u rangbah u dei uba khaïi skum bad ha kato ka janmiet u la leit kit skum ha ryngkat ki kali jong u bad katba ki kali jong ki, ki dang ïaid ki don ki briew san ngut kiba la pynsangeh ïa ka kali jong ki bad ha kane ka por ki la shoh, la kyrdem ïa u Bah Shempung Mangu bad da ka jingïarap u Blei u la lait phet na ka kti jong kine ki briew.
Shuh shuh u la ïathuh ruh ba une u rangbah u la ksaid bad poi sha ka surok bad pynsangeh kali bad donbok ba ka kali kaba u pynsangeh ka dei ka kali kit skum kba bad hadien ba u la ïathuh ha u dribar kane ka kali u la pyntip sha ki bahaïing ha kaba ka kmie jong une u rangbah wut-wut ka la wan sha kane ka jaka, ha kaba u la ïathuh ba ki don ki briew kiba shoh ïa u.
U ne u rangbah ba la shah shoh u la ïathuh ruh ba u la pang lut ka met ka phad, khamtam ka shadem namar ki la kyrdem ïa u. “Ngam sngewlah shuh ban im,” u la ong.
U Bah Phestar Mangu u ong ruh ba ka kmie ka la thmu ban ïalam ïa u sha jaka sumar hynrei ha shiteng lynti u la khlad noh. Ki bahaïing hasem ki la leit ban ujor ruh sha Mawlasnai Outpost ha kaba na ka liang ki pulit ki la wan shim noh ïa ka met jong u ne u rangbah ban leh ïa ka Post Mortem ha Civil Hospital Nongpoh bad hadien ba ki la pyndep ïa baroh ki jingdonkam, ki pulit ki la rah noh ïa ka met ba sah une u rangbah sha ka jaka ba u sah ban leh burom khatduh. Nalot kata, ki bahaïing hasem ki la kyntu ïa ka tnad pulit ban kem bad pynshitom da kaba tyngeh ïa kine ki riew thrang snam kiba la shim ïa ka jingim jong u ne u rangbah.
