Imphal, Nohprah:
Ka seng Manipur Petroleum Dealers Fraternity (MPDF) ka la ai ïa ka jingpynbna kaba khatduh sha ka Sorkar da kaba pynbna ban sdang biang ïa ka jingïakhih jong ka lyngba ka jingkhang ïa ki jaka theh umphniang ha kylleng ka them Manipur bad ki jaka ba marjan, namar ka jingbym lah jong ka sorkar ban ai kano kano ka sienjam kaba bha ha kaba ïadei bad ka jingbyrngem pynbthei bom bad ka jingthmu ki runar ban dawa pisa.
Ha ka jingpynbna lyngba ki lad pathai khubor ba la pynmih ha ka sngi U Blei, ka 21 tarik u Nohprah, ka seng ka la pynpaw ïa ka jingsngewsih kaba khraw halor ka jingbym don kano kano ka jubab kaba skhem halor ka jingthoh ba la aiti sha u Lat ka jylla Manipur ha ka 10 tarik u Nohprah, 2025. Ïa ka dorkhas la dawa kyrkieh pyrshah na kine ki trai jong ki pump naba ka la don ka jingshah byrngem ïala ka jingim bad halor ki jingdon jingem, kynthup ki jingbyrngem pynbthei bom bad ki jingdawa pisa beaiñ.
Katkum ka jingong jong ka kynhun, wat hapdeng ka jingeh jong ka jinglong jingman, ym shym la shim ïa ki sienjam kiba treikam haduh mynta, kaba la pynbor ïa ki nongdie mar ban rai da kawei ka sur ban pynjur ïa ka jingïakhih jong ki da kaba pynsangeh noh ïa ki jingtreikam tad haduh ban da pynbeit ïa ki jingeh jong ki lyngba ka jingpynbeit kaba don jingmut bad kaba ïajan.
Haba pynshai ïa ka nongrim jong ki, ka MPDF ka la ban jur ba ki nongdie petrol pump ki treikam pyrkhing kum ki agent ba la ai bor jong ka sorkar bad ki dei ban die ïa ki umphniang ha ka dor ba la buh, ba la mynjur da ka sorkar. Ki nongdie umphniang kim don bor ban pynkylla dor bad katkum ka aiñ la bthah ïa ki ban lum ïa ka khajna Value Added Tax (VAT) na ka bynta ka sorkar jylla – T.19.56 shi litar ha ka umphniang petrol (25 percent) bad T.10.11 shi litar ha ka diesel (13.5 percent) kaba long ka jingmih kaba kongsan jong ka jylla.
