Shillong, Nohprah 22
Ka NWCC XI ka la pynliem noh ïa ka Combine XI da 6 wiket bad ka Shillong Sixers ka la jop da 32 run ïa ka Mawklot CC ha ka lympung ïalehkai Third Division Cricket League ha ka lah sngi U Blei.
Ha kane ka jingïakhun kaba la long ha madan Urkaliar, ka Combine XI Laban Pyllun kaba la jop ïa ka kynting pisa, ka la shimti ban tied nyngkong ha kaba ka la kamai tang 98 run hadien ba ka la shah pynkhyllem noh ki nongtied ha ki 18.2 over. Kane la wan lyngba ka jingïalehkai u Arun Sunar, uba la lah ban pynhap 4 wiket. U nongtied ka Combine XI u Steve Nongkynrih u la long u nongtied uba la ïoh bun eh da kaba kamai 16 run na ki 38 bol.
Haba wan shimti ïa ka pali kaba ar ka NWCC XI ka la lah ban kynjoh sha ka thong da kaba kamai 100 run bad shah pynhap 4 wiket ha ki 8.5 over. U Ravi Shankar u la long u nongtied uba la ïoh bun eh da kaba kamai 28 run na ki 15 bol. Katba u Reuben A. Najiar u la khur 3 wiket na ka bynta ka Combine XI. Ïa ka nam Player of the Match la khur da u Sanjiv Ghosh, uba la kamai 24 run bad pynhap 2 wiket.
Haba phai sha kawei pat ka jingïakhun kaba ar, ka Mawklot kaba la jop ïa ka kynting pisa, ka la ailad shwa ïa ka Shillong Sixers ba kan tied nyngkong ha kaba ka la kamai 182 run bad shah pynhap 10 wiket ha ki 19.4 over. U Amir Shiekh u la khyrwit ïa ka shiteng spah kaba 56 run na ki 37 bol. Katba u Teibok Kharbudnah u la khur 2 wiket na ka bynta ka Mawklot.
Haba wan beh ïa ka thong, ka Mawklot ka la shah pynkhyllem baroh ki nongtied bad kamai tang 150 run ha ki 18.1 over. Kane ka la wan lyngba ka jingïalehkai bha u Evert Mawlong, uba la lah ban pynhap 4 wiket. Katba u Donaldy Kharshandi u la kamai 27 run na ki 20 bol. Ïa ka nam Player of the Match la khur da u Sandeep Roy, uba la kamai 36 run bad khur 3 wiket.
