Lucknow, Nohprah:
Arngut ki nongleh kam sniew kiba shah thong ha ka khlieh jong ki da T. 1.5 lak ki la ïap ha ki jingïasiat bad ki pulit ha ki distrik Saharanpur bad Bulandshahr jong ka Uttar Pradesh ha ka por ba ki pynlong ïa ki kam runar ha ka miet shiteng synñia jong ka Saitjaiñ bad Sngi U Blei, la ïathuh ki pulit.
Ki pulit jong ka UP kin bteng ïa ki kam pyntriem jong ki ïa ki kam runar kiba la pynbeit ryntih bad kiba donbor, ong u Additional Director General (ADG), Law and Order, u Amitabh Yash.
Ka kynhun jong ka Special Task Force (STF), kaba treikam katkum ki jingtip jong ki nongsyntiat, ka la khanglad ïa u Siraj Ahmad, uba la shah wad ha ka kam pynïap briew bad uba kit ïa ka jingthong kaba T. 1 lak, ha ka thaiñ Gangoh jong ka Saharanpur ha khappud Punjab-Haryana.
U Ahmad, uba dei u nongshong shnong jong ka Lolepur ha Sultanpur distrik, la kynnoh ba u la siat ïa ka kynhun jong ki pulit STF, bad ki pulit ki la pynphai kylla kum ka jingïada ïalade, ha kaba u Ahmad u la mynsaw, la ïathuh ki ophisar pulit.
La rah ïa u sha ka hospital kaba don hajan, ha kaba u la khlad noh ha ka por ba dang shah sumar, la bynrap shuh shuh ki ophisar.
Na ka kti jong u, ki pulit ki la ïoh kurup kawei ka thuk thuk, ar tylli ki pistol (.30 bore bad .32 bore), bun bah ki kuli bym pat pyntreikam, ki kuli ba la pyndonkam, saw tylli ki mobile phone, ar tylli ki Dongle Wi-Fi, kawei ka pla bad ki kot donkam.
U Ahmad, u la don palat 30 tylli ki mukotduma, ba kynthup ïa ka kam pynïap briew, ka jingthmu ban pynïap bad ki mukotduma hapoh ka National Security Act (NSA), kiba la mudui pyrshah ïa u ha kylleng ki distrik jong ka Uttar Pradesh.
Ha kawei pat ka jingjia ha Bulandshahr, ka kynhun ba ïatreilang jong ki pulit jong ka Kotwali Dehat bad ka Gulawathi ki la siat kum ka jingpynshitom haba u Azad uba la tip kyrteng kum u Zubair uba la tip ruh kum u Peter u la kynnoh ba u la siat ïa ki.
Ha kane ka jingïasiat, uwei u pulit u la mynsaw bad u Azad, uba 35 snem ka rta, uba la shah thong ha ka khlieh jong u da T. 50,000, u la ïap.
La rah ïa u Zubair sha ka jaka sumar jong ka distrik, ha kaba ki doktor ki la pynbna ba u la khlad noh mar ïa poi ha kane ka jaka.
Ki pulit ki la ïoh kurup ïa kawei ka suloi be-aiñ kaba don .315-bore kaba don ïa ki kuli bym pat pyndonkam bad kiba la dep pyndonkam bad kawei ka thuk thuk kaba khlem don ïa u Registration Number.
U Zubair, uba sah ha ka thaiñ Lisadi Gate ha Meerut, u la shah thwet ha bun tylli ki kam lute bad tuh, kynthup ïa ka jinglute mobile phone, thuk thuk bad ka pisa ha ka 2 tarik Naiwieng, 2025, bad ka jinglute ïa ki 18 tylli ki blang na kawei ka jaka ri ha ka thaiñ Gulawathi ha kaba sdang jong une u snem.
U la don kumba 47 tylli ki mukotduma ba la ujor pyrshah ïa u ha kylleng ki distrik ha Uttar Pradesh, Delhi bad Uttarakhand, kynthup ïa ki jingshah kynnoh kam runar, kam tuh bad ki kam runar ba ïadei bad ki kynhun runar.
Katkum ka jingtip ba thikna jong ki pulit, ki don haduh 265 ngut ki nongleh kam sniew kiba la shah pynïap ha ki jingïasiat jong ki pulit ha Uttar Pradesh naduh u Lber 2017.
