Shillong, Nohprah 22
Ki nongshong shnong ka shnong Tlongpleng kaba hap hapoh ka Mawsyn-ram Police Station, ki la lap ïa u bom uba la thep hapoh ka byrni hajan ka dukan hapoh shnong.
Ïa une u bom la lap ha ka janmiet jong ka 21 tarik mynta u bnai bad mar-mar ki la pyntip noh sha ki bor pulit.
Kumta ha ka sngi kaba bud, ka 22 tarik u Nohprah 2025, ki pulit ki la wan poi sha shnong Tlongpleng kaba dei ka lynti na Mawsynram sha Balat ban pynlong ïa ka jingpeit bniah.
Haba ïoh ban ïakren bad u Rangbah Shnong ka Tlongpleng, u Bah T.Disiar lyngba ka phone u la ïathuh ba ïa kine ki bom la thep hapoh byrni khaw, bad ki pulit ba kynthup ïa ki pulit na Shillong, na Mawsynram bad na Dangar ki la rah noh ïa u ne u bom.
Shuh shuh u la ong ruh ba ki paidbah baroh ki la ïa tieng lut namar lada u ne u bom u bthei kan sa wanrah ka jingjia kaba sngewsih ïa ki nongshnong shnong.
Nalor kata, u la ïathuh ba ki pulit pynlip bom ki la pyntikna ba u dei u bom bad ym tip pat mano ba wan buh ïa u bom ha katei ka jaka.
U la ong ba na ka liang ka shnong kam pat don jingsuba sniew ïano-ïano kiba wan buh ïa u tei u bom hapoh ka shnong.
