Shillong, Nohprah 22
Ki nongïalam shnong ka Mawlai Nongpdeng hapoh ka jingïalam u Bah Kit Kharshïing ha ka 22 tarik u Nohprah 2025, ki la ther tyngeh ïa u MLA ka Mawlai, u Bah Brightstarwell Marbaniang halor ka jingwan kam jong u ïa ka surok kaba trei shitom hi da ki nongshong shnong ban pynïoh.
Hadien ba u MLA u la wan poi ha katei ka jaka, ki nongïalam shnong, ba kynthup naduh ki seng longkmie, ki seng samla bad ki rangbah ki la ïa ap khraiñ ban pynpaw ïa ka jingpyrshah jur ïa ka jingwan kam u MLA, ba kane ka surok ka dei kaba la pynïoh da ma u.
U Bah Kit u la ther tyngeh markhmat ïa u MLA, da kaba kynnoh ba u MLA u la shu wan kam ban pynïoh ïa katei ka surok, hynrei ka dei ka jingtrei shitom hi da ki nongshong shnong, kiba la buddien na ka por sha ka por lyngba ka tnad Sorkar.
“U Bah Brightstarwell Marngar um shym la don bynta eiei halor kane ka surok, namar ba kane ka surok dei ka jingtrei shitom jong ki paidbah nongshong shnong bad ka jinglakloi jong u Symbud Myntri Rangbah ka Jylla, u Bah Prestone Tynsong uba la sngewsynei ban ai pynshna ïa kane ka surok.
Shuh shuh u Bah Kit u la sangah ruh da kaba ong “Kam don jingmut ban shu ong ïeid jaitbynriew tang da ka ktien hynrei ka kam pat ym leh eiei. Lah ban kdew ba kane ka dei ruh kum shibynta ban pynshai halor ka jingkynnoh jong u MLA, ba ki nongïalam shnong ki la ïalam bakla ïa u paidbah bad markhmat u MLA mynta u Rangbah Shnong ka Mawlai Nongpdeng u la pynshai ha ryngkat ka jingïadonlang ki nongïalam shnong baroh.
Kane ka surok na Mawlai Nongpdeng kaba la sdang pyntrei mynta, dei kaba poi shaduh sha Sub Station Border Blok-C bad Blok-B kaba la kot kumba T.4.31 klur. Kane ka surok kaba dangsah ban pyntrei mynta ka dei sa tang kumba 300 metre eiei. Haba jubab pat halor ka jing kynnoh, u Bah Brightstarwell u la ong ba kum u MLA u dei hok ban leit peit ïa baroh ki surok kiba hap hapoh ka Mawlai Konstitwensi bad ka dei ka kamram jong u ba un pyntikna ba ka surok ka dei ban long kumba ju long.
“Ka dei ka kamram jong nga ban leit jngoh la kadei naduh ba sdang ne hapdeng ka jingtrei bad haduh kaba kut ruh kumjuh. Nga buddien ha baroh ki kam khnang ba kan nym long kaba sepei,” u la ong.
Ha kaba ïadei bad ka jingkynnoh ba u MLA u la kynnoh ba ki nongïalam shnong ki la ïalam bakla ïa u paidbah, u Bah Brightstarwell u ong “Ngam shym la kynnoh ïa baroh ki nongpynïaid shnong hynrei katkum ba nga lap ha ki rynsan social media ba kumno kita ki nongpynïaid shnong ki pyrshang ban pynthoh bria ïa nga kum u MLA”.
U la bynrap ruh da kaba ong ba dei tang ma u, uba leit ha man la ki shnong hadien ba la jop ha ka ilekshon ban ai khublei hadien ba ki paidbah ki la pynjop ïa u ha ka ilekshon. Nalor kata, u Bah Brightstarwell u la ong ruh ba lada bat ma u kum u Myntri ba dei khmih ïa ka surok u la shna bun ki surok ha Mawlai, bad halor ka jingong ba dei ba pynïoh u Bah Prestone ïa katei ka surok ha Mawlai Nongpdeng, u Bah Brightstarwell u ong ba kadei ka kamram jong u Bah Prestone ban leh bad kam dei kaba long kyrpang haduh katta-katta.
