Nongpoh, Nohprah 22
Kumba 68 ngut ki ophisar pulit ba kynthup ïa Deputy Superintendent of Police (Probationers), Cadet Inspector, Cadet Sub Inspectors, Assis-tant Sub Inspectors ki la lah ban pyndep ïa ka jingshah ai jinghikai jong ka 55th Basic Course ha North East Police Academy (NEPA), Umiam bad la wan ban sakhi da ka Kong Idashisha Nongrang, Director General of Police ka Jylla kum ka kongsan.
Kitei ki ophisar pulit kiba la pyndep ïa ka jingshah hikai ki kynthup ïa 15 ngut na ka Jylla Meghalaya, 5 ngut na Manipur, 24 ngut na Nagaland, 10 ngut na Tripura bad 14 ngut na Sikkim bad na kine, ki don kumba 21 ngut ki ophisar kynthei.
La seng ha u snem 1978, ka North East Police Academy ka dei kaba ju pynlong ïa ka jingai hikai sha ki ophisar pulit kiba dang rung kam thymmai ha ka kyrdan Deputy Superintendent of Police (Probationers), Cadet Inspector, Cadet Sub Inspectors bad Assistant Sub Inspectors jong baroh phra tylli ki Jylla ka Thaiñ Shatei Lam-Mihngi. Kumba long haduh mynta, kane ka jaka, kala lah ban ai jinghikai haduh 1043 ngut ki DSP bad 4221 ngut ki Sub Inspector na ki Jylla bapher-bapher ka thaiñ Shatei Lam-Mihngi.
Ha kane ka 55th Basic Course kaba la sdang naduh ka 5 tarik u Kyllalyngkot mynta u snem 2025, ki nongshah hikai ki hap ban pyndep ïa shibun ki jingpule ba kynthup naduh ka sobjek Police Science, Legal Studies bad Social Science nalor ki jinghikai siat suloi, ki jingkilanmet bad kiwei-kiwei de kiba ïadei bad ka rukom treikam ka tnad pulit.
Shuh shuh, na ka liang jong ki nongshah hikai ha kane ka 55th Basic Course ki lah ruh ban pyndep ïa ka Post Graduate Diploma ha ka lain Police Administration & Investigation na ka Sardar Patel University of Police, Security and Criminal Justice kaba don ha Jodhpur.
