Shillong, Nohprah 22
Ha ka kyrwoh kaba tyngeh kaba la pynmih ha ka Lah Sngi U Blei, u President ka Voice of the People Party (VPP), Bah Ardent Miller Basaïaw-moit u la pynrem jur ïa ki jingbyrngem jong ka Hynñiewtrep National Liberation Council (HNLC) ban pynïap ïa ki nongïalam ka VPP.
Kane ka jingkren ka la wan shisngi hadien ba kane ka seng lehnoh ka la maham pyrshah ïa ka VPP kaba synshar mynta ïa ka Khasi Hills Autonomous District Council (KHADC) halor ka jingkynnoh pynslem ai Sanad ïa u Syiem ka Hima Sohra.
Ha ka kyrwoh lyngba ka dur-khih, u Bah Ardent u la ong, “Ngi sngew kyndit bad lyngngoh ban ïohi ïa ka jingbyrngem pynïap ïa ki nongïalam ka VPP ba la mih ha ki lad pathai khubor. Kum ka seng ngi pynrem jur ïa kane ka jingbyrngem. Dei u paidbah uba la jied ïa ka VPP ban synshar hapoh KHADC, kumta ka HNLC kam don hok ban tuklar ïa ka jingtreikam jong ngi. Dei tang u paidbah uba lah ban bret ïa ngi na KHADC lada u shem ba ka jingtreikam jong ngi ka long pyrshah ïa kaei kaba ngi la kular ïa u paidbah”.
U la bynrap ba ki don shibun ki kynrum-kynram ha ka jingsynshar jong ki Hima bapher-bapher, kynthup ïa ka Hima Sohra, bad ka jingthmu jong ka VPP ka long ban wanrah ïa ka jingsynshar kaba khuid bad kaba don ka jingkitkhlieh naduh ki shnong ki thaw, ki Hima bad ka Jylla baroh kawei.
Une u khlieh nongïalam ka VPP u la ong ruh ba u kloi ban long ‘lang kñia na bynta ka jingmyntoi jong ka jaidbynriew.
“Lada kata ka jingpynïap jong ka HNLC ïa ngi ki nongïalam kumjuh ïa nga u nongïalam ka VPP kan wanrah ïa ka bit ka biang, ka shong suk – shong shngaiñ, bad ka jingmyntoi ïa ka jaidbynriew, nga long uba kloi ban long ‘lang kñia na bynta ka jingmyntoi jong ka jaidbynriew. Kane ka jingbyrngem ka long ka kabu kaba khraw ïa kito kiba don ka jingthmu kaba sniew ïa ngi ki nongïalam ka VPP, kumta ka HNLC kan ym lah ban lait na ka jingkitkhlieh ne ban sait khuid ïalade lada ka don kano-kano ka jingjia kaba sniew ïa ngi kum ki nongïalam jong ka VPP,” u la ong.
U Bah Ardent u la pynbna ruh ba un ym wad jingïada na ka Sorkar ne ki bor pulit, da kaba buh ïa ka jingshaniah kaba pura (jong u) ha u Blei uba u shakri.
“Ngan ym wad ki lad jingïada na ki bor pulit ne bor Sorkar namar nga tip ba ka jingim jong nga ka shong ha U Blei uba nga shakri, uba long u nongthaw jong nga,” u la ong da kaba sot ïa ka jingkren u David bad bynrap, “shisha la nga ïaid ha ka them ka syrngiew ka jingïap, ngan ym sheptieng ïa kaba sniew namarba me don ryngkat ma me bad nga.”
U Bah Ardent u la buh jingkylli ruh ïa ki jingthmu ka HNLC, da kaba kylli hato ka kynhun ka kwah ban phai biang sha ka synshar Syiem ne ka jinglaitluid na ka ri India, da kaba kyntu ïa ki paidbah ba kim dei ban sheptieng ne rit mynsiem.
“Kaei ka jingkwah jong ka HNLC? Hato ka kwah ban pynphai biang ïa ka synshar Syiem, ne ka kwah ba ngin lait noh na ka ri India? Kine ki long ki jingkylli kiba ka HNLC ka hap ban pynshai sha ki paidbah. Kum ki nongïalam ka VPP, ngi la mad shibun ki jingeh bad jingbyrngem ha ki por ba mynshuwa, hynrei ngin ym kynran dien ban ïaid ha ka nongrim kaba beit kaba biang na bynta ki longdien ki mandien jong ngi.”
Shuh shuh u President ka VPP u la ban biang ïa ka jingangnud jong ka seng na ka bynta ka jingsynshar kaba bha bad ka bha ka miat jong ki pateng ban wan, da kaba ban jur ba ka kam jong ki – ka dei kaba la pynshong nongrim thik halor ka jingkwah ban pyntikna ïa ka lawei kaba bha na ka bynta ka jaidbynriew.
