Mawkyrwat, Nohprah 22
Ka long kaei kaei kaba kmen haduh katta katta na ka bynta ki paidbah nongshnong jong ka shnong Sakwang bad ki riew ïeit ïa ki jingïalehkai napoh ka South West Khasi Hills District kiba la ap khmih lynti mynta da ki phew snem ïa kata ka madan ïalehkai ba bha, kaba la kular ruh da ka Sorkar Jylla ha kaba mynta ka kynti kane ka jingangnud ka la urlong hadien ba ka Sorkar ka la mang pisa haduh T.44 klur tam ban tei ïa ki madan ‘Synthetic Athletic Track’ ha ki 3 tylli ki jaka hapoh ka Jylla, kawei ha shnong Sakwang, kawei ha Ribhoi bad kawei pat ha Garo Hills.
Haba kren ha ki lad pathai khubor hadien ka jingleit jngoh ïa ka shnong Sakwang, u MLA ka Mawkyrwat, u Bah Renikton L. Tongkhar u la pynpaw ïa ka jingkmen kaba khraw haba u la pynbna paitbah ba ka Sorkar Jylla ka la dep mang pisa na ka bynta kane ka madan ïalehkai ha Sakwang bad shen yn sa ïoh ban pyntrei noh ïa ka, bad u la khmih lynti ruh ba kane kan long shisha ka jingkyrkhu ïa ki paidbah.
Kumta, u Bah Renik u la ai khublei kyrpang ïa ki paidbah jong ka shnong Sakwang kiba ju ïatreilang ryngkat bad ka Sorkar Jylla khamtam eh u Myntri Shnong, Bah Shainingstar Kharjahrin ha kaba ïa ka ITI ruh la ïoh ban tei ha kane ka shnong, bad na ka bynta ka BIET kaba la sahkut mynta la bun snem. U Bah Renik u la ïathuh ba ka jingïakren ka dangïaid shakhmat ban ïoh jingmang pisa ban tei noh da ka DIET ha katei kajuh hi ka jaka.
