Shillong, Nohprah 28
U Symbud Myntri Rangbah ka Jylla ba khmih ïa ka tnad Kam Pohïing Bah Prestone Tynsong u la pynpaw biang ba ka Sorkar ka dang ïaleh bad dang long kloi ban sdang biang ïa ka jingïakren ïasuk bad ka seng kieng atiar ka HNLC kaba la shah kheiñ beaiñ.
Ha kajuh ka por u la maham ruh ba ka bor Sorkar kin pyntreikam pyrkhing bha ïa ki aiñ pyrshah ïa kino kino ki kam bymman bad kiba pynthut ïa ka suk ka sain ba la leh da kane ka kynhun hapoh ka Jylla.
Kane ka jingkren jong u, ka long hadien ka jingpynbthei bom IED ha ka 15 tarik u Nohprah da ka HNLC ïa ka kompeni Dhar ha East Jaiñtia Hills.
“Haba ïadei bad ki kam beaiñ-la ka dei ka HNLC ne mano mano ruh- ka aiñ ka don ban leh tyngeh pyrshah ïa kiba pynkheiñ ïa ka suk ka sain, kam pher la ka dei ka HNLC ne mano mano ruh. Ka jingkhang jong ka Sorkar ka dang plie ïa ka HNLC ba kan wan sha ka jingïakren ïasuk. Lada phi dang leh ïa ki kam bymman, ka Sorkar kan pyntreikam pura ïa ki aiñ. Ngi long ba kloi ban ïakren ïasuk, ngi kyntu ïa ka kynhun ba kan wan biang sha ka miej ïakren,” ong u Bah Prestone.
Halor ka jingbyrngem ka HNLC ïa u Symbud Myntri Rangbah Bah Sniawbhalang Dhar, u Bah Prestone u la pynthikna ïa ka jingpahara kaba khlaiñ bad ba pura ïa u Symbud Myntri Rangbah lem bad ïa baroh ki nongshong shnong.
“Ngam tharai ba kum kane ka kam ruh dang hap ban kylli namar ka dei ka kamram jong ka Sorkar ban ai jingïada ïa baroh ki nongshong shnong ka Jylla. Khamtam haba ngi ïohi ba ka don ka jingbyrngem ïa ka jingim, ngam tharai ba ngi donkam ban batai namar phi sngewthuh ba ngin ai ïa ka jingïada kaba khlaiñ. Na ka tnad Pulit, ngi lah leh ïa ki kam ban pynkhlaiñ ïa ka jingpahara”.
Halor ka jingkam ba bun ki MLA na ri-lum Khasi bad Jaiñtia kila ïoh pdiang ïa ka shithi dawa pisa na ka HNLC, u Bah Prestone u la ong, “Ïa mynta, em, ngam tip ba haduh katno ka dei ka jingshisha kane ka jingkam da kane ka Seng ba bun ki MLA kila ïoh pdiang ïa ki shithi dawa pisa. Hynrei, ka Sorkar bad ki Pulit kila kyrpad ym tang ïa ki MLA hynrei ïa kino kino ruh kiba ïoh pdiang ïa ki shithi dawa ba kim dei ban tieng hynrei ban pyntip sop sop sha ka Sorkar bad ki Pulit khnang ba kin ïoh leh ïa kaba donkam.
Halor ka jingkynnoh ka HNLC ba ka jingpynbthei bom IED ka dei namar ka jingkyntait u Bah Sniawbhalang ban siew ïa ka pisa ba dawa, u Bah Prestone u la pynshai, “Ym don seng satia-la ki dei kiba la kheiñ beaiñ ne em-kiba lah ban ong ba phi hap ban siew ïa kane ka pisa lane phi hap ban leh ïa kane, leh ïa katai. Kam don satia ka kyndon ïa kane lait noh satang da don ka jingïasngewthuh jingmut hapdeng ki ar mamla. Ka jingdawa pisa hi ka dei ka kam beaiñ, bad ka Sorkar kam don jingtip la u Symbud Myntri Rangbah Bah Sniawbhalang Dhar u la pyntip ne em sha ka Sorkar ba u ïoh pdiang ïa ka shithi dawa pisa”.
U la bynrap “Ka HNLC nyngkong kala kam ba u Bah Sniawbha u la siew ïa ka pisa bad mynta une u juh u briew um siew pisa shuh-ta ka daw ngam lah ban ong eiei halor kane- hynrei kum kine ki kam ngi shim ba ka dei ka kam dawa pisa jubor bad ngin nym ailad ïa ki kam dawa pisa ba kin don hapoh ka Jylla”.
Ha kajuh ka por, u Bah Prestone u la pyntip ba ïa mynta ki pulit kim pat shym la kem briew shuh halor kane ka jingjia pynbthei bom IED ha Dhar Construction Company.
