Moscow, Nohprah:
Ka tnat iada jong ka Russia, ha ka Sngi U Blei ka la pyntip ba ka la ioh ban siat pynbthei ia 111 tylli ki drone jong ka Ukraine hapoh jong ki 3 kynta jong ka jingleit thombor jong ka Ukraine sha ki 6 tylli ki bynta jong ka Russia, kynthup ia 8 tylli ki drone kiba leit rung shaduh ka nongbah Moscow ba phang pdeng jong ka Russia.
U heh katei ka nongbah, u Sergei Sobyanin, u la ïathuh ba sa 11 tylli kiwei pat ki drone la ioh ban siat pynbthei ha katei hi ka miet katba ki dang thmu ban leit rung sha ki nongbah bapher jong ka Russia.
Ka tnat syntiat jong ka Russia ruh ka la ïathuh ba hadien katei ka jingjia, ki Kad liengsuiñ jong ka Vnukovo bad Sheremetyevo ki la pyrkhing jur ia ka rukom treikam ban peit thuh bad bishar bniah ia ka jinglong- jingman shalor suiñ namar ka jingjur ki jingleit thombor ka Ukraine ha katei ka miet ba la dep.
La ong ba wat hapdeng ki jingpynbeit jong ka US ban wanrah noh ia ka jingïakren iasuk hapdeng ka Ukraine bad ka Russia, hynrei ka Russia bad ka Ukraine kim shym la lah hi ban iabeit ne iapyndem kumba la khmih lynti da ka US bad kiba bun ki tnat jong ka pyrthei ban wanrah noh ia ka jingiasuk hapdeng ka Russia bad Ukraine kiba la ïakhun ia ka thma mynta la 4 snem kynthih.
