Shillong, Nohprah 28 (UNI)
Ki pulit ka Meghalaya bad ka Border Security Force (BSF) ki la kyntait ïa ki jingkam jong ka Dhaka Metropolitan Police (DMP) ba ki 2 ngut na ki suba donkti ba hakhmat eh ha ka jingpynïap ïa u Sharif Osman Hadi ki la phet krad sha Meghalaya.
“Ngi (pulit Meghalaya) ngim pat shym la kem ïa ki nong Bangladesh ha Tura. Ngim tip hi ruh la kitei ki 2 ngut ki nongsiat (ki suba donkti ha ka jingpynïap ïa u Hadi) ki don ha Tura,” ong u Rupam Marak, heh pulit ka West Garo Hills ïa ka UNI.
“Ngam tip balei ki pynmih ïa ki jingkam ba lamler sha ki lad pathai khubor bad ym don pulit Bangladesh kiba la ïakren bad ngi (pulit Meghalaya). Ki lah ban ong ruh ba kitei ki 2 ngut ki nongleh kam sniew mynta ki la phet krad sha kawei pat ka ri,” la pynskhem u Marak.
Ki lad pathai khubor ka Bangladesh, da kaba sot ïa ka jingkren u Additional Police Commissioner (Crime and Operations) ka DMP, u S.N. Nazrul Islam, u la ïathuh ba kitei ki 2 ngut kiba suba donkti – u Faisal Karim Masud bad u Alamgir Sheikh ki la jam sha shiliang Meghalaya lyngba ka khappud Haluaghat kaba hap hapoh ka Mymensingh distrik jong ka Bangladesh tang hadien katto-katne por ba la siat ïa u Hadi ha ka 12 tarik u Nohprah, 2025.
“Kitei ki suba donkti ki la rung sha India lyngba u khappud Haluaghat. Ki nong Bangladesh, u Philips bad u Sanjoy ki la ïarap ïa ki ban jam sha shiliang bad la pdiang ïa ki da u Purti ha India. Hadien, uwei u nongñiah taksi, u Sami u la leit buh ïa ki sha sor Tura ha Meghalaya,” katkum ki jingthoh ki lad pathai khubor ka Bangladesh ïa ka jingkren u Nazrul.
U Nazrul u la kam shuh-shuh ba u Purti bad u Sami ki la shah kem ha ki pulit ka Meghalaya bad ka DMP ka la ïakren bad ki pulit ka Meghalaya ha kaba ïadei bad kane ka kam.
Haba kdew ïa katei ka jingkren u Nazrul kum ka jingpynphriang jingtip kaba thok, u Inspector General ka BSF, Meghalaya Frontier, u O.P. Upadhayay u la ong, “Hangno ka sabut? Ai ba kin wan ban ïasam ïa ka sabut bad ngi. Kine ki dei ki jingkynnoh kiba lamler bad ki bym don nongrim.”
“Ki khappud ki khang khyrdep bad ki shipai ki don hapdeng ka jingpeitngor bad jingpahara kaba jur namar ka jinglong-jingman ba mynta ha Bangladesh. Ym don kano-kano ka sabut ban pyni ba uno-uno u briew u la jam sha shiliang khappud bar-ri na ka bynta jong ka Haluaghat sha Meghalaya,” u la ong.
Shuh shuh ka Sorkar Meghalaya ha u Naiwieng ba la dep ka la pynjari da ka korphiw miet – naduh 8 baje mynmiet haduh 6 baje mynstep hapoh ka jingjngai kaba 1 km na u ‘Zero Line’ jong u khappud India-Bangladesh.
