Shillong, Nohprah 28
Uwei u samla pule MBA ba 24 snem ka rta na Tripura u la khlad noh ha kawei ka ‘hospital’ ha Dehradun ha ka Sngi Thohdieng hadien ba u la ïakhun na bynta ka jingim jong u la palat ar taïew hadien ka jingshah dung kaba la kynnoh ba ka la mih na ka jingïabeiñ jaidbynriew.
U Angel Chakma u la ngat ha ka jingshah thombor ha ka 9 tarik Nohprah ha ka thaiñ Selaqui jong ka Dehra-dun katba u dang leit thied jingthied ryngkat u para jong u. Ki paralok ki la ïathuh ba um shym la tip briew (pura) shuh ha ki 14 sngi ba u don ha ‘hospital’.
Katkum ka ejahar pulit ba la ujor da u para bad u, u Michael Chakma (21 snem ka rta), kitei ki arngut ki la shah kah lynti ha ka kynhun ki hynriew ngut ki briew kiba la kynnoh ba ki la kren beiñ jaidbynriew ïa ki, da kaba khot ïa ki kum ki “Chinki”, “Chinese” bad “Momo”.
Uwei na kitei la kynnoh ba u la kren beiñ, “Ko nong China, phi la wan ban thied doh sniang?”
Utei u samla uba dang 24 snem ka rta, la kynnoh ba u la shah shoh na ka khlieh bad ka met da ka tiar kaba nep bad ka ‘kadaa’ (bracelet) hadien ka jingïakynad bad 5-6 ngut ki briew ha ka jaka bam, katkum ki lad pathai khubor.
U Michael hadien kane, u la ïathuh ha ki pulit ba u hynmen jong u, u la jubab da kaba jai-jai hynrei da kaba skhem, da kaba ong, “Ngim dei ki nong China…Ngi dei ki nong India. Kaei ka syrnot kaba ngi dei ban pyni ban pynshisha ïa kata?”
Ki pulit ki ong ba ka jingïakynad ka la nang heh. Haba u Michael u la pyrshah ïa ki jingkren beiñ jong ki, la kynnoh ba u la shah tied na ka khlieh da ka ‘bracelet’.
Katba ka jingshah thombor ka dang bteng, u Angel u la wan ban ïada ïa la u para jong u.
Ha katei ka jingshah thombor, ki pulit ki ong ba u Angel u la shah dung na ka khlieh bad ka met ha u Yagya Awasthi, u nongshah kynnoh donkti ba hakhmat eh. U la kyllon ha katei ka jaka, katba ki nongthombor ki la phet krad.
U Michael u la pynkit mar-mar ïa u sha ka jaka sumar kaba don hajan.
U Senior Sub-inspector, u Jitendra Kumar jong ka Selaqui Police Station u la ong ba hadien ki doktor ki la pyntip sha ki nongtohkit ba ka tari ka la pynjulor ïa u budlum jong u Angel Chakma.
Hadien kane, u la don hapdeng ka jingshitom jur bad um shym la tip briew (pura) shuh.
Haba ïadei bad kane, la pynngat mukotduma ha ka 12 tarik u Nohprah da kaba pynshong nongrim halor ka jingujor u Michael Chakma hapoh ki kyndon ka Bharatiya Nyaya Sanhita.
Ha ka 14 tarik u Nohprah, hadien ba ki doktor ki la buh jingthoh ïa ka jingjur jong ki jingmynsaw jong u, ki pulit ki la pyndap shuh-shuh ïa ki jingkynnoh ba la pyrshang ban pynïap bad ka jingïasylla kam sniew.
Shuh shuh la kem noh ïa 5 na ki 6 ngut kiba shah kynnoh donkti, kynthup ïa 2 ngut kiba hapoh 18 snem ka rta, ha ka 14 tarik u Nohprah. U nongshah kynnoh donkti ba hakhmat eh, u Yagya Awasthi, u dang phet rieh.
Ki pulit ki la ïathuh ba la suba ba u Awasthi u la phet rieh sha Nepal.
“La phah ar tylli ki kynhun pulit ban buddien bad ban kem ïa u, bad la pynbna ruh ïa ka khusnam kaba T.25,000,” la ong u Senior Sub-Inspector Kumar.
Hadien ha jingkhlad noh u Angel Chakma ha ka Sngi Thohdieng, ki pulit sa shisien ki la kyntiew biang ïa katei ka mukotduma, da kaba pynrung ïa ki bynta ba ïadei bad ka jingpynïap briew bad ka jingleh kam runar da ka jingthmu kaba ïadei lang.
