Shillong, Nohprah 28
Ka kam jngohkai pyrthei ha ki thaiñ Dawki ka la nang kiew bad bun ki jingmih na ka jingwantuid ki nongwan jngohkai pyrthei, ka don ïa ka bynta kaba kongsan ban ïarap ïa kiba bun ki longïing ha ka thaiñ, ha kaba ki lah ban shaniah ha kane ka kam.
U Bah Phren Kongwang, Sordar ka Raij Mukertilla u la ïathuh ba ki nongwan jngohkai pyrthei ki wan ban peit ïa ka jingitynnad jong ka Wah Umngot bad ki nongshong shnong ki ïoh jingmyntoi shibun na ka jingtuid ki nongwan jngohkai.
U Sordar u la ong ba, na ka daw ka jingsniew ka surok ka don jingthud khyndiat haba ïadei ka jingwantuid ki nongjngohkai pyrthei, hynrei ki nongshong shnong ka thaiñ ki don ka jingkyrmen da ka jingtuklar u Symbud Myntri Rangbah u Bah Prestone ba yn lah ban pyndep noh ïa ka jingshna ïa ka surok ha ka por kaba la buh.
Haba ïakren bad ki nongwan jngohkai pyrthei ka Prashamita Dey, kaba dei na Siliguri, West Bengal ka la ong ba ka dei ka sien ba nyngkong ba ka wan sha kine ki jaka bad kaba pynpaw ba ka wah ka long kaba khuid bha bad ka long kaba itynnad.
Shuh-shuh ka la ai jingïaroh ruh ïa ka jinglong jong ki paidbah jong ka thaiñ bad ka jingkloi jong ki ban ïarap. Ka la kyntu ïa baroh kiba wan jngohkai ban long kiba don ka jingkitkhlih ban lehkhuid bad ban ym bret pathar ïa ki plastik. Haba ïadei ka surok ka la pynpaw ba ka ïohi ïa ka jingtrei ka la ïaid sha khmat bad kyntu ban ïai-shah shipor bad baroh ki long kiba biang lud.
U Soujit Saha uba dei u nongwan jngohkai pyrthei haba ïoh ban ïakren u la pynpaw ba ka thaiñ Dawki ka long kaba itynnad bad sngewtynnad, watla un khlem sngewthuh ïa ka kren ka khana, ka ktien ka thylliej, hynrei u la pynpaw ba ki jaka ki long ki ba itynnad bad ki briew kiba sngewtynnad.
Kumta u la kyntu ïa ka Sorkar ba kan pynbha ïa ki surok bad ki lynti ki syngkin khangba ki paidbah kin ïoh ban wan peitkai ïa ka jingitynnad jong katei ka thaiñ.
