Shillong, Nohprah 28
Haduh kumba 40 tylli ki dukan kiba la shna da ki dieng ki la kylla dpei lut hadien ba ka ding kaba klang ka la ïoh ban bam lut naphang.
Katkum ka khubor la ong ba ha ka miet jong ka 27 tarik u Nohprah, 2025, ha ka por kumba 9 baje eiei, ka la don ka jingjia pluh ding kaba jur ha Dongwah, Lad Rymbai kaba dei harud surok ha jaka long ïew.
Mar ïa ïoh jingpyntip, ki bor pulit ki la phah sha ki nongtrei ka Fire and Emergency Service, Lad Rymbai kiba la mareh sha katei ka jaka lem ki kali pynlip ding.
Da ka jingïarap ka Fire and Emergency Service, Lad Rymbai bad Jowai kumjuh ka puh shilum jong ki riew shimet, la lah ban pynlip ïa ka ding.
Ha katei ka jingpluh ding kam shym la don kano kano ka jingjia kaba pynmynsaw ne shim ïa ka jingim briew hynrei 40 tylli ki dukan ba la shna da ki dieng ki la kylla dpei.
Kane ka la wanrah ka jingduhnong kaba khraw ïa ki trai bad nongshong dukan bad ka daw ka jingpluh ding ym pat lah satia ban tip shai watla ka jingsuba ka dei na ka jingthut ka bor ding ilektrik.
Shuh shuh ki dukan ba la shna da ki dewbilat ruh ki la mad jingjulor bad jingduhnong na kane ka jingpluh ding.
