Shillong, Nohprah 28
Ki paidbah nongshong shnong ha ki thaiñ khappud ki mat jingeh na ka daw ka jingdon ki kynrum-kynram bad ka jingwan tuh bad rung tuh jong ki briew na Ri Bangladesh.
Haba ban ïakren bad u Bah Phren Kongwang, Sordar Raij Mukertilla u la ïathuh ba dang shen u la leit sha ka jingïalang ha Bangladesh ha kaba ki nongmihkhmat jongki, ki la pynthikna ban ai ka jingïatreilang, u la ïathuh ruh ba, ki nongïalam ki la pynpaw ba lada lap ba ki nong Bangladesh ki donkti ha ki kam tuh, dei ban kem bad aiti sha ki pulit bad ymdei ban pynmynsaw ne ktah kti ïa ki.
Nalor kata u la ïathuh ba ka jingïadie ïathied bad ka jingïadei ka long kaba suk ba saiñ hapdeng ki nong Bangladesh bad nong India. u la ïathuh ruh ba ka la don ka jingïakren bad ki Border Security Force (BSF) ban ai ka jingïatreilang bad na ka por sha ka por ki BSF ki ju wan jurip.
Shuh-shuh u la ïathuh ba ka jingrung jingmih sha Ri Bangladesh mynta ka long kaba kham pyrkhing bha bad kam long laitlan shuh kum ha ki por ba ladep. Kat kum ka jingïathuh jong u Bah u Phren, ki shipai BSF ki ju pynlong ka jingpahara ba 24 kynta kaba la ïarap ban pynkhlaiñ ïa ka jingpahara ha katei ka thaiñ bad lada don kano-kano ki ju wan khot ban kylli pyrthew bad ki BSF ymdon jingeh ei-ei lait nong tang haba ïadei ka jingbym ïa sngewthuh ïa ka ktien ka thylliej.
