Shillong, Nohprah 28
Ka United Democratic Party (UDP) kala pynpaw ba ka khlem tynruh satia ïa ka Sorkar ba kan pynlait noh mardor ïa ka kaiphod jong ka Expert Committee halor ka State Reservation Policy (SRP).
Haba kren sha ki lad pathai khubor, u General Secretary ka UDP Bah Titosstarwell Chyne u la ong, “Ka ju long hi kumne bad ngi ruh ngi la aiti ïa ki jingai jingmut bad haba ka Sorkar kala thung ïa ka committee, ngi khmih lynti ba ka committee kan aiti ïa ka kaiphod”.
U la bynrap ba u Myntri Rangbah ka Jylla dang shen u la pynshai ba ka kaiphod ka don hapdeng 4000-5000 sla bad la pynjanai ïa ka hashuwa ban pynmih paidbah.
Haba kylli halor ka jingbyrngem ka Voice of the People Party (VPP) bad u MLA Bah Ardent M Basaiawmoit ban ïakhih lada ym sei paidbah noh ïa ka kaiphod, u Bah Titos u la ong, “Kam don jingpher satia naba ngi la ap la slem, kumta ngin ïa ap ïa ka Sorkar ba kan pynlait ïa ka kaiphod ha ka por kaba dei”.
U la ban jur ba ka jingdawa ban pynlait noh mardor ïa ka kaiphod ka dei ka kam ka bym sngew ïahap satia ïa ka UDP.
“Naba u Myntri Rangbah u la dep pynshai ba ka Sorkar ka dang pynjanai ïa ka kaiphod ban lap ïa kino kino ki jingbakla kum ki jingbakla spel dak, ka senten bad kiwei kiwei. To ngin ïa ap ïa ka Sorkar ba kan pynbeit ïa ki jingbakla shuwa ban pynlong paidbah,” ong u Bah Titos.
