Shillong, Nohprah 28
Ka Shillong Cricket Association (SCA) ka la sdang ïa ka lympung ïalehkai First Division Cricket League 2025-26 ha ka sngi Saitjaiñ ha madan ïalehkai jong ka MCA ha Polo.
Ha kane ka lympung ki don shiphew tylli ki kynhun ha kaba la phiah ïa ki ha ki ar tylli ki group. Ha ka group-A ki long ka United XI, kumjuh ka NWC, Malki XI, Nongkseh United bad ka MLP, katba ha ka Group-B ki long ka Donkins CC, Lawsohtun CC, Metallica CC, Khalsa Warriors bad ka Winds CC.
Ha ka jingïalehkai ha katei ka sngi sdang, ka United XI ka la pynliem noh ïa ka MLP da 142 run. Ka United XI kaba la kam trai ban tied nyngkong, ka la kamai 293 run bad shah pynhap 5 wiket ha ki 40 over. U Yogesh Tiwari u la tied marwei haduh 129 run na ki 82 boil. Katba u Morning Start Khongwir u la kh ur 3 wiket.
Haba wan shimti ïa ka pali kaba ar, ka MLP ka la kamai tang 151 run bad shah pynkhyllem baroh ki nongtied ha ki 23.4 over. U Ranjit Roy u la tied 53 run na ki 39 bol. Katba u Bijon Dey u la khur 4 wiket. Ïaka nam Player of the Match la khur da u Yogesh Tiwari.
Haba phai sha ka jingïakhun ha ka sngi U Blei, ka Winds ka la jop da 79 run ïa ka Warriors. Ka Winds kaba la shimti ban tied nyngkong, ka la kamai 263 run bad shah pynkhyllem 7 wiket ha ki 40 over. U Dapanju T. Lama u la tied 74 run na ki 97 bol bad u Sameer Chaudhary u la ïoh 58 run na ki 65 bol. Katba u Sawan Singh bad u Rahul Singh ki la khur mar 3 wiket.
Haba wan beh ïa ka thong, ka Khalsa Warriors ka la kamai tang 184 run bad shah pynkhyllem baroh ki nongtied ha ki 38.1 over. U Victor Deb u la tied 27 run na ki 30 bol, kumjuh u Suraj Singh u la ïoh 25 run na ki 50 bol bad u Lakhan Singh Nahar u la ïoh 26 run na ki 20 bol. Katba u Pritam Singh, Gaurav Jyoti Thakuria bad u Sameer Chaudhary ki la khur mar 2 wiket na ka bynta ka Winds. Ïa ka nam Player of the Match la khur da u Sameer Chaudhary.
