Dhaka, Nohprah:
Ka Myntri Rangbahduh barim jong ka Bangladesh, ka Khaleda Zia, ka don hapdeng ka jingshitom kaba jur bha, la ïathuh u doktor shimet jong ka. Ka Zia, kaba long ka Chairperson jong ka Bangladesh Nationalist Party (BNP), ka la don 80 snem ka rta ha kane ka kynti bad la ong ba ka la shah sumar ha Evercare Hospital jong ka nongbah Dhaka, naduh ka 23tarik u Naiwieng, namar ki jingshitom ba bun jait ha ka met jongka.
Ha ka 11 tarik u Naiwieng, la buh ia ka ha ka “jingkyrshan jong ka kor pynhiar mynsiem ban ai jingjahthait ia ki snier bad kiwei kiwei ki dkhot met kiba kongsan jong ka.” “Ym lah ban len ba ka jinglong jingman jong ka, ka la kham bha. Ka dang iaid lyngba ka por kaba eh haduh katta katta,” la ong u Dr AZM Zahid ha ka jingialang kaba la pynlong tang hadien shiteng miet jong ka sngi saitjain ha bar jong ka Evercare Hospital, khlem da pyntip lypa.
U Dr. Zahid u la kyntu ruh ia ka jaidbynriew ban duwai na ka bynta u Zia ba un koit noh, ong ka news portal bdnews24.com.
U khun jong ka bad u Acting Chairperson ka BNP, u Tarique Rahman, u la pynlut por palat 2 kynta ha katei ka jaka sumar, ha shwa ba un mih noh tang khyndiat por shwa ban shiteng miet, la iathuh ki dkhot jong ka seng jongka.
Baroh 2 ngut ki doktor napoh ri bad nabar ri ki la iatrei lang ha ka ban sumar ïa ka Zia bad la ong ba ka khun ksiew jong ka, ka Dr Zubaida Rahman ruh ka la ïashim bynta lang ban ai ka jingsumar kaba paka naka bynta jong katei ka nongialam barim jong ka Bangladesh.
Ka BNP ka la pynpaw mynshwa ba kan kham kwah ban rah ia u Zia shabar ri ban ioh ia ka jingsumar kaba kham shalor. Hynrei ka jinglong jingman jong ka met jong ka mynta kam shah ban leit jingleit da ka liengsuiñ, kumta ka jingsumar jong ka ka dang ïai bteng hi hapoh ri.
