Bah D. Pakyntein
Ka ju mih ka jingkylli, ba bunsien balei ba ïa kaei kaba lah shah hikai bad pule mynta, tang shipor lah kletnoh, hynrei haba sngap bad pule pat ïa ki jinghikai U Jisu Khrist, ym lah shuh ban klet da lei-lei ruh. U nonghikai bastad, u sngewthuh, ba kam myntoi ban hikai lada ki nongsngap kim sngewthuh. Lah jan baroh ki jingkylli, U Jisu, U jubab ha ki pharshi, bad kane ka pynlong ïa ki nongsngap ban wad, bad da puson bha ïa ki jingmut kita ki pharshi, katba lah ka bor pyrkhat-pyrdain, bad shisien ba lahshai, ki rung jylliew shapoh ka khlieh, ym donkam ban pule lyndet lane pyndonkam da ki kot ïarap, bad lada ngi bud ne ym lah ban bud ïa ki jinghikai, ym lah ban pyndam ne weng shuh na ka jabieng. Ha kiba ngeit, kine ki pharshi ki dei, ki jingshisha bakynja mynsiem, ki wanrah ïa ka jingïatiplem ha uba tip, ki pynstad ïa uba wad, bad ruh ki pynsuk ban trei ïa baroh ki kam ki jam lada dei ha ki kam lajong, kam sorkar, kam hikai bad kumta ter-ter, ka ïarap ruh ïa ki nongbishar bad ki nongsynshar; kat kum ka sap kaba lah ai da U Blei hi.Ha ki bym ngeit pat, ki dei tang ki jingïathuh khanapuriskam, kiba tang khyndiat por lah klet noh.
U Jisu U kyrkhu ïa ki khynnah : Ym don khynnah ba kwah ban shah khot, ba ki dei ki khun-dakaid ne khun-tamsneng; ki khynnah hi barabor, ki kwah beit ba ioh ka nam ‘khun-tipsngi’ bad ki sngewtynnad bha ban tip ba U Jisu U khot ïa ki bad ban iohsngew ïa ki kyntien ba u ong, ha kita ki rangbah baki khunlung ki long ka Hima U Blei, ba uno uno uba khlem pdiang ïaka kum u khun khynnah, un ym leit bsut hapoh jongka. Ka jingkyrkhu kaba ïaineh junom.
Ka pharshi u thiat : Hangne don arjait ki thiat, uwei u thiat ka hima ki bneng, uba pynïar kumba sieb jai-jai u purew baroh; bad uwei pat uba hap ban kiar, uta u dei u thiat ki Pharisi.
Ki nongtrei ha ka brisoh : Haba u trai ïing, u la ai bainong ïaki nongtrei, kita kibatrei naduh mynsngi, ki lah lyngngoh bad khñuim, ba lah siew mar katjuh bad kita kiba wan slem; u trai ïing u ong ha ki ban shim ïa ka lajong bad ba kin leit phainoh, bad ka shong ha ka mon ka jong u, katno un ai bad u la bynrap ruh ban ong ba u long uba bha, bad ka khmat ka jong ki ka long kaba sniew, ka pharshi ïa ka khmat kaba bishni bad kaba pihuiñ.
Ka pharshi ki talent : Baroh lah ai ïaki sap ki buit bapher-bapher bad ka shong ha ki nongioh ban pyndonkam khnang ban lah ban pyndep hok ïa ki kam-ki jam, katkum ka mon U Blei; ïa uba trei shitom,uba pyniohnong bad treihok, un ioh bainong kham bun, katba ïa uba jaituh, uba pynduhnong, bad u bym treihok, wat ïa kaba u don ruh on shim noh, bad yn bret ïa uta u shakri bym myntoi sha kaba dum kaba khamjngai; hangta yn long kaba lynñiar bad kum dait bniat.
Baroh ki jinghikai U Jisu Khrist, ki lah pynkyndit thred ïa ki paidbah ! naba u la hikai ïa ki kum uba donbor, ym kum ki nongthoh te, bad ki Pharisi kiba shu kwah ban ïaidkai ha ki jingkup kiba jynsur, bad ban ioh ïa ka jingithuh ha ki ïew; kiba tang shisien ruh kim lah ban jop ïa U Nonghikai uba stad tam.
