Shillong, Nohprah 28
Ha ka step jong ka 28 tarik u Nohprah, 2025 la ïoh jingtip ba ka la don ka jingshah thang dusmon jong lai tylli ki kali kiba la pynïeng harud surok ha ka dong Umkor, Pynursla.
Katkum ki tyllong khubor la ong ba kine ki kali ba la shah thang dusmon bad ingkhong khait ki kynthup ïa ka kali Swift kaba don ïa u registration number ML05-AE-2904, ka kali Scorpio bad ka kali Redigo kiba khlem lah ban ïoh ïa ki registration number jong ki.
Shuh shuh ki tyllong khubor ki la ïathuh ba ka jingshah thang kitei ki kali ka dei ba la don shwa ka jingïakynroi bad jingïashoh hapdeng uba ñiah ïa katei ka kali Swift bad ar ngut ki briew ha ka por shwa ban poi ka step synñia ka 28 tarik u Nohprah, 2025.
La ong ba ha ka jingïashoh bad kitei ki ar ngut ki briew kiba buaid, uba ñiah ïa katei ka kali Swift u la dait ïa uwei na ki kaba la pynlong ban jaw snam ha kaba la ïohi lyngba kawei ka dur khih (video) ïa ki dak bit snam ha katei ka kali shwa ba kan shah thang.
Hadien katei, ki ar ngut ki la phet noh bad shipor ki la wan bad ka kynhun kaba kham bun ngut bad kthong ban shoh ïa uba ñiah kali Swift.
Mar kumta une uba ñiah kali Swift u la ieh ïa ka kali bad phet krad sha khlaw na katei ka jaka bad poi pat sha Urksew Wahpathaw bad thmu ban wan shim pat ïa ka kali ynda la step.
La suba jur ba ka jingthang ïa katei ka kali la leh da kitei ki briew hadien ba ki khlem ïoh shuh ïa u nongñiah kali Swift ha ka jingthang jong ki ïa katei kali ka la pynlong ïa ka ding ban pur lang sha ka kali Scorpio bad Redigo.
Kine ki kali ki la ingkhong khait bad ha ka por mynstep u trai ka kali Swift ryngkat ki bahaïing ki la wan ujor da ka ejahar ha thanad Pynursla ban kyntu ïa ki pulit ban kem ïa kiba donkti kiba don napdeng jong ki, kiba u ithuh khmat.
La ïoh jingtip ba ki trai jong kitei ki ar tylli ki kali ruh ki la wan buh ejahar ha thanad Pynursla pyrshah ïa kiba donkti ha katei ka kam ïa kiba la kynnoh ba ki wan ha ka fete ba la pynlong ha katei ka dong Umkor bad haduh ba pyllait ïa kane ka khubor, ki pulit ki dang pynlong ka jingtohkit bad jingthwet.
