Lucknow, Nohprah:
Naba ka jingpyntreikam ïa ka Special Intensive Revision (SIR) ha Uttar Pradesh ka la kut ha ka sngi Thohdieng, ki la don kumba 2.89 klur tylli ki kyrteng na ki 15.44 klur baroh ki ban sa shah weng noh na ka Draft Electoral Roll.
Wat la la dep pynjlan arsien ïa ka por jong ka SIR, hynrei ym shym la lum ïa ki jingtip ba bniah jong ki 2.89 klur ngut ki nongthep vote (kaba long la kumno kumno 19%).
Katkum ki tyllong khubor ba la ïohlum, la ong ba napdeng ki 2.89 klur ngut ki nongthep vote kiba yn pyndam noh ïa ki kyrteng jong ki, 1.26 klur ngut ki dei kiba la leit buhai shnong, 46 lak ngut ki dei kiba ïap, 23.70 lak ngut ki dei kiba mih na kiba shisha, 83.73 lak ngut ki bym ju mih bad 9.57 lak ngut ki dei na kiwei pat ki kyrdan.
U Chief Electoral Officer ka UP u Navdeep Rinwa u la ïathuh ba ïa ka thup thep vote ba la thmu yn sa pynmih ha ka 31 tarik u Nohprah, 2025.
Ïa ki jingdawa bad ki jingpyrshah halor ka thup thep vote ba la thmu yn pdiang naduh ka 31 tarik u Nohprah haduh ka 30 tarik u Kyllalyngkot, 2026.
Katba naduh ka 31 tarik u Nohprah haduh ka 21 tarik u Rymphang, 2026, ïa ki rai halor ki phorm jingkheiñ bad ka jingpynduh ïa ki jingdawa bad ki jingpyrshah yn sa leh ha ka por ba pynbna.
Nangta ïa ka thup nongthep vote ba khatduh yn sa pynmih ha ka 28 tarik u Rymphang 2026. Lah ban pynkynmaw ba ka Election Commission jong ka ri India ka la pynjlan ïa ka por SIR ha ka 11 tarik u Nohprah ha ka sien kaba ar da ar taïew haduh ka 26 tarik u Nohprah, 2025.
Ym tang katta, ka jingtrei ban shna map ïa ka thup thep vote jong u snem 2003 bad ka thup thep vote kaba mynta ruh la pyndep.
Kumba 91 percent ki briew kiba la kynthup ha ka thup nongthep vote kaba mynta na ka thup thep vote jong u snem 2003 ki la ïadei dur.
Kum kine ki nongthep vote la ïadei da ka kyrteng jong ki hi, ki kmie ki kpa, ki kmieïeid ki kpaïeid.
Mynta ïa ki jingpynbna yn phah da ka Election Commission tang sha ki khyndai na ka shispah ngut ki briew kiba long kumba 1.11 klur ngut ki briew.
Ïa ki jingpynbna yn phah da ka ECI sha ki ïing jong ki. Kin hap ban ai ïa ki kot ki sla sha ka Commission kum ka jingpynshisha ba ki dei ki nongthep vote.
Mynta, la shim ïa baroh ki lad ki lynti na ka bynta ban pynmih ïa ka thup nongthep vote kaba khuid.
La bthah ïa baroh ki DM jong ki distrik ba kin pyllait ïa ka Draft Voter List da kaba husiar bha. Dei ruh ban pynneh ïa ka jingshai kaba pura ha kaba pynbeit ïa ki jingdawa bad ki jingpyrshah kiba ïaid shakhmat.
