Jowai, Nohprah 29
Ka Khynroo Khyllood Committee Seinraij ryngkat ka Lei Synshar Cultural Society kum ka dak ka jingkynmaw burom ïa ka lyngkhuh snem ïap kaba 163 u Kiang Nangbah ha ka 29 tarik Nohprah kala pynlong ka jingïakynduh lang kaba kyrpang jong ki samla ka thaiñ Rilum Jaiñtia kaba tip kum ka 3rd Kiang Nangbah Youth Conference ha ïing Dorbar Seinraij.
Ha kane ka sngi u Ma Wanroy Challam, Chief Engineer, PWD Building ka Sorkar Jylla u la long kum u kongsan ha ka jingïalang kaba la pynïaid da u Ma Kyrshanlang Kharbuki, Chairman Khynroo Khylood Committee Seinraij.
La ïoh ka jingnguh blei nguh syiem na u samla Heiniwanda Oo Lato Assistant Secretary Khynroo Khylood Committee Seinraij katba u Ma OH Toi President Seinraij Jowai u la pashat ki kyntien ai mynsiem hapdeng ki khun samla.
Arngut ki riew shempang kynthup u Ma Dawanpoi Passah u la kren halor ka phang “U Kiang Nangbah Kam u Khon Dapchynrang” bad u samla Heirtami Paswet Member Khynroo khylood Committee Seinraij u la kren halor ka phang “Ki kam wa chemphang wa tule yei suk ka patein”.
U Ma Wanroy Challam kum u kongsan ha ka jingkren u la ong, haba kren shaphang u Kiang Nangbah, kaba hakhmat kum ka pateng ka dei ban buh ïa u dak jingkylli kaei ka kamram ïa ka ri bad ka jaitbynriew?
U la kyntu bad ai mynsiem ruh ïa ki samla ban im sngi bad bud nuksa ïa ka nongrim u Woh Kiang Nangbah kata ban long kiba shlur, ban im hok, ïatylli bad ban long ki samla kiba ïaishah.
