Shillong, Nohprah 29
Ka kynhun ki nongseng kam lajong kiba don hapoh ka shatri jong ka Joint Entrepreneurs Transforming Society (JET’s) ha ka sngi Nyngkong ki la ïoh ban pynlait paidbah ïa ka Alamanak 2026 (Callender)
Ka JET’s ka don ïa ka jingthmu ban pynïar, ban kyntiew bad ban ïarap ïa ki jong la jong, ka dei ka kynhun jong ki nongseng kam kiba la tbit, kiba trei na ka bynta ban pynwandur thymmai ïa ki rukom treikam bad kaba lah ban kyntiew ïa ka ïoh ka kot ka imlang ka sahlang lyngba ka jingïatreilang da kaba pyndonkam ruh ïa ki kor ki bor ka teknoloji.
Kiba don ha kane kynhun JET’s ki kynthup ïa ka Jet24/7, ka KDS print, ka Taste of Tribes bad ka M3 Design Creative Hub.
Ïa ka Alamanak 2026 jong ka Joint Entrepreneurs Transforming Society la pynlait paidbah da u Member of Parliament ka Shillong Parliamentary Seat u Dr Ricky AJ Syngkon ha ka jingdon ryngkat lang u nongseng ka Jets24/7 u Bah Pynskhemlang W Uriah, u trai ka ka KDS print u Bah Balambokstar Dkhar, u trai ka M3 Design Creative Hub u Bah Pynskhembor L Mawnai bad ki nongtrei jong ka Taste of Tribes.
U Dr Ricky AJ Syngkon haba ai jingkren, u la ai jingïaroh ïa ka jingdon mynsiem jongki ban ïasohlang ha kawei ka kynhun da kaba u la kdew ba ka jingïatylli ka long ka bor bad pynpaw ruh ïa ka jingdngewtynnad ba ka kynhun jongki ka don ïa ka jingthmu ban ïarap bad ban kyntiew ïa ki jong la jong.
Shuh-shuh u la kyntu ïa ki, ban treihok bad trei janai ïa ka kam haba ki shimti ïa kano kano ka kam, ym da kaba shu leh tang ban dep, da kaba u la ai mynsiem ba ki jingeh ha ka jingïaid lynti ka kam kin don beit, hynrei ban shim ba ki jingeh kin long ki mawjam ban pynjanai ïa ka kam bad ba ha kaba kut u soh jong ka jingtreishitom un kylla long u soh ba thiang.
