Jowai, Nohprah 29
Ka Seinraij Jowai lyngba ka jingpynïaid ka Ñiamtre Committee ryngkat ka jingïatreilang ka Seiñraij Khonshnong ha ka 27 bad 28 tarik Nohprah kala pynlong ïa ka Dorbar Ñiamtre ki khun ka Ri Khatar Dolloi-Lai Phew Syiem ha shnong Khonshnong kaba hap hapoh ka Elaka Raliang, Laskein Block.
Ha ka sngi nyngkong jong ka Dorbar Niamtre kala don ka prokram kyrpang haba ïadei bad ka niam ka rukom, ka riti dustur ha kaba ki khun ka Niamtre na ki raid ki shnong bapher kila wan ban ïashim bynta.
Ha ka sngi kaba bud, ïa ka Dorbar Ñiamtre la pynlong ha madan Kynroh Arliang ba la pynïaid da u Ma Raymond Nartiang, Chairman NTC-SRJ bad la ïoh ka jingnguh blei nguh syiem na u Ma Kitbhahlang Sumer, Secretary KKC Seinraij Khonshnong, ka jingpynher ïa ka lama da u Ma Hamecheki Papeng Langdoh Raij Khonshnong, u Ma Return Passah President KKC Seinraij Khonshnong u la pashat ki kyntien pdiang burom, katba u Ma Kune-i-langki Passah Sangot Raid Khonshnong u la ïathuh ïa ka khana shaphang ka Khonshnong.
Ki riew rangbah kiba la kren halor ki phang bapher bapher ki long u Dr. Mihchwa Tyngkan Adviser Seinraij Raliang uba la kren halor ka phang “Iabang Snein Iabang Kroo ya ka niam ka rukom u nangye u pynkhroo”, u Bah Paia B Synrem, Assistant General Secretary Seng Khasi Kmie Mawkhar Shillong halor ka phang ‘Ka Niam hapdeng ki jingkylla ba bha’ u Ma OH Toi President Seinraij, Jowai halor ka phang “Pynsarot yei iong i dahi kam wa da dep kyrkhu ki blai”.
U Ma OH Toi ha ka jingkren u la ong, ka jaitbynriew Hynñiewtrep Hynñiewskum ka dei kaba la kyrkhu da u Blei ha baroh ki liang, hynrei lada phai pat ha kajuk mynta ka jaitbynriew ka don hapdeng ki jingtynjuh bad bun kiba kwah ban pynduh pyndam ïa ka jinglong kyrpang jong ka.
Ha kane ka sngi la pyllait paidbah ruh ïa ka Almanak 2026 jong ka Khynroo Khylood Committee Seinraij Jowai bad la pynkup burom ruh ïa ki longïing kiba la wanphai biang sha ka Niamtre kumjuh ïa ka Kong Nimanchwa Laloo DFO Wildlife Division, Jowai na ka bynta ki kam babha jong ka ïa ka Raij Khonshnong.
La pynphuh pynphieng ïa ka Dorbar Niamtre da ki jingshad jingrwai tynrai ba la shim bynta da ki samla bad longkmie na ki Seinraij bapher bapher.
La pynhiar ïa ka lama da ka Kong Merry Sumer kawei na ki longkmie kaba la heh rta ka Seinraij Khonchnong bad la pynwai ïa ka Dorbar Niamtre da ki kyntien sngewnguh na ka Kong Kheinkor Papeng, Secretary Seinraij Khonshnong.
