New Jersey, Nohprah:
Katkum ki khubor, la ong ba 2 tylli ki helicopter ki la iatyngkhuh halor suiñ katba ki dang ïaid lyngba ia ka nongbah New Jersey ha ka Sngi U Blei, ha kaba uwei u la khlad noh syndon bad uwei pat u la mynsaw jur.
U Heh Pulit jong ka Hammonton, u Kevin Friel, u iathuh ba ki nongpyllait im, ki la jubab ia ka khubor jong ka jinghap liengsuin, ha ka por kumba 11:25 baje mynstep.Ka video na katei ka jaka, ka pyni ia ka helicopter, kaba iaid stet sha madan. Hadien kata ki pulit bad ki nongpynlip ding ki la pynlip noh ïa ki ding kiba la bam duh ïa kawei na ki liengsuiñ.
Ka tnad pynïaid liengsuiñ jong ka sorkar pdeng ka la batai ïa kane ka jinghap kum ka jingïatyngkhuh ha suiñ hapdeng ka Enstrom F-28A bad ka Enstrom 280C helicopter halor ka kad liengsuiñ jong ka Hammonton Municipal. Tang ki pilot ki don ha kawei pa kawei ka liengsuin. Uwei u la iap, bad uwei pat la pynkit sha hospital da ka jingmynsaw kaba lah ban pyniap.
U Sal Silipino, uba dei u trai jong kawei ka Cafe kaba don hajan ka jaka ba leit hap kitei ki liengsuiñ, u la ong ba ki nongñiah liengsuiñ ki dei kiba wan man ka por ha katei ka jaka bam bad ki ju ïabam ja miet lang. U la ong ba ma u bad kiwei pat ki nongthied ki la peit ia ki liengsuiñ ba ki kiew shwa ba kawei kan sdang ban sngap jar shapoh, bud sa kawei pat.
“Ka long ka jingjia kaba sngew kyndit haduh katta”, u la ong. “Nga dang khynñiuh sah naduh katei ka jingjia.”
U nongshong shnong jong ka Hammonton, u Dan Dameshek, u la ïathuh ha ka NBC10 ba u dang mih na kawei ka jaka ïalehkai bad u la ïohsngew ïa ka jingsawa kaba jam bha bad u la ïohi ïa ar tylli ki helicopter ba ki la ïaid shabar khlem da lah ban tehlakam.
