Nongstoiñ, Nohprah 29
Kan long shisha ka jingkyrkhu bad ka jingmyntoi kaba khraw ïa ki samla pule bad ki paidbah jong ka dong ka thaiñ jong ka Mawshynrut konstitwensi kumjuh ruh ïa ki konstitwensi kiba marjan hadien bun bun snem kaba ki paidbah ki la angnud ban ïoh ïa ka government College, ha kane ka kynti kaba mynta ka Mawshynrut kan sa sdang noh shen ban pynïeng bad pyntrei ïa ka college. ïa kane la pynthikna da u Bah Methodius Dkhar, MLA ka Mawshynut, ha ka sngi Saitjaiñ jong ka taïew hadien ba ma u ha ryngkat ki riew rangbah, ki nongïalam shnong, ki nongïalam jong ki kynhun bapher bapher ha ryngkat ki kontrakor kiba ïoh ban trei ïa kane ka kam, ki engineer ki la leit ban jurip ïa ka jaka ban tei ïa ka college ha kajuh ka por ban ai lain ban sdang ban pyntrei noh ïa ka college.
Shuh shuh ïa kane ka College yn tei bad pynïeng ha kawei na ki jaka hapoh ka shnong Mawthengkut jong ka Mawshynrut Konstitwensi bad ïa kane ka college la tip kum ka Government Model Degree College kaba la wan lyngba ka skhim Rastriya Uchchattar Shiksha Abhiyan (RUSA) ha ka mang pisa kaba T.15 klur ïa kaba la mang da ka Sorkar Kmie, ka ban shna naduh ki building, Administrative unit, ki hostel bad kiwei kiwei.
U Bah Methodius haba kren sha ki lad pathai khubor halor kane ka college, u la pynpaw ïa ka jingai khublei ïa u Myntri Rangbahduh ka Sorkar Kmie, u Myntri Rangbah ka Sorkar Jylla kiba la sngap lem ïa ka jingkyrpad ka jong u kum u MLA bad ki paidbah ka Mawshynrut, nangta ïa ki Myntri ba dei peit ïa ka tnad pule puthi kiba la kyrshan ïa ka jingangnud jong ki paidbah ka Mawshynrut.
U la ong ruh ba kane ka jingangnud jong ki paidbah ka Mawshynrut kam dei tang kaba ki angnud mynta hynrei ka dei ka jingangnud kaba da ki phew phew snem mynshuwa kaba ki paidbah ki la kwah ban ïoh ïa ki college ha kane ka jaka hynrei sniew bok ym don ïa ka college ha baroh shikatta hynrei kane ka khubor ka long ka khubor kaba sngewkmen ïa baroh ki paidbah nongshong shnong jong ka konstitwensi hi baroh kawei bad lehse kam dei tang ïa ka konstitwensi jong ka Mawshynrut hynrei ïa ka Mawshynrut Civil sub division baroh kawei kaba yn sa ïoh ban sdang noh ban pyntrei ïa kane ka college. Shuh shuh u la ïathuh ruh ba na ka liang u Myntri ka tnad pule puthi u la kren ba dei ban trei kham sted ïa kane ka kam bad ki kwah ban pyndep kham kloi ïa kane ka jingtrei bad hapoh u 2027 dei ban pyndep ïa ka jingtei ïa kane ka Government College.
“Ngi sngewthuh ïa ka jingeh jong ki paidbah bad khamtam ïa ki kmie ki kpa ban phah ïa ki khun sha ki skul ha Shillong bad ha kiwei kiwei ki jaka bad ka jingktah hi ka long ba kiba bun hi ki nongshong shnong jong ka Mawshynrut ki dei ki nongrep ki nongbylla bad ka jingphah ïa ki khun sha kiwei ki jaka ka long ka jingeh haduh katta katta ha kaba ka bai wai ïing, ki bai kali bad kiwei kiwei ki jingdon kam bad teng teng ka pynlong ïa ki kmie ki kpa ban pynpep noh tang shiteng por ïa ka jingleit skul bad teng teng ki khun ruh watla ki don ïa kata ka jingnang ka jingstad ruh na ka jingisynei ïa ki kmie ki kpa kaba ki hap ban trei shitom teng teng ki sangeh noh ïa ka jingpule bad ka long kaei kaei kaba sngewsih ban ïohi ba ki khun ki kti kiba don ïa ki sap ki phong ki hap ban sangeh shiteng por ïa ka jingpule,” ong u Bah Methodius Dkhar.
U Bah Methodius u la pynpaw ruh da kaba ong, “Nga ngeit skhem ba ka jingdon jong kane ka College kan ïarap shibun ïa ki kmie ki kpa ban pynduna ïa ka jinglut ka jingsep ka jong ki bad khamtam eh ïa ki khun ki kti, ki khun samla kiba don ka jingthmu ban bteng ïa ka jingpule kan long ka lad ka lynti ïa ki ban pyndep ïa ka jingangnud”.
