Lucknow, Nohprah:
Ki la don kumba 200 ngut ki nongshong shnong jong ka shnong Piprauli ha Budaun kaba ha ka jylla Uttar Pradesh kiba la ïoh ïa ka jingai dawai Rabies kum ka lad jingïada hadien ba ki la lap ba ka raita (ka jingbam ba la shna da ka doi bad khleh ha ka jingbam) kaba ki la bam ha ka jingleit onthang briew ka dei kaba la shna na ka dud jong ka muid kaba la ïap hadien ba ka la shah dait ha u ksew.
Katkum ka jingïathuh jong ki nongshong shnong, la pynlong ïa ka jingleit onthang ha katei ka shnong ha ka 23 tarik u Nohprah, ha kaba ki la bam ïa ka raita.
Hadien la paw pyrthei ba ka dud ba la khem na kata ka muid ka dei kaba la khleh ha ka jingbam ba ki la bah bad ka dei kaba la shah dai ha uwei u ksew ha ki khyndiat sngi shwa.
Kane ka muid ka la ïap ha ka 26 tarik u Nohprah, hadien kata ka jingtieng ka la saphriang ha ka shnong namar ka jingtieng ïa ka jingpang Rabies.
Ki nongshong shnong ki la poi sha ka jaka sumar paidbah jong ka Ujhani bad ki la ïoh ïa ka jingai dawai ïada.
U Chief Medical Officer u Dr Rameshwar Mishra ha ka sngi U Blei u la ïathuh ba ki la ïoh jingtip ba kawei ka muid ha katei ka shnong ka la shah dait ksew ba don ïa ka jingpang bad ka la ïap noh namar ki dak ki shin jong ka jingpang Rabies.
La ïathuh ba ki nongshong shnong ki la bam ïa ka raita kaba la khleh lang bad ka dud na kane ka muid. Kum ka lad jingïada, la bthah ïa baroh ban ïoh ïa ka injekshon Rabies.
“Ka jingïada ka kham bha ban ïa ka jingpynkoit. Baroh kiba don kano kano ka jingartatien la ai ïa u dawai pyrshah ïa ka jingpang. Kumba ju long, kam don jingma na ka jingpang hadien ba la shet ïa ka dud, hynrei ïa ka jingai dawai la leh khnang ban ïada na kano kano ka jingma kaba lah ban mih,” ong u Mishra.
Katkum ka jingïathuh jong ka tnad ka koit ka khiah, la ong ba ym shym la don kano kano ka jingpang kaba la saphriang ha katei ka shnong haduh mynta, bad ka jinglong jingman ka long kaba thikna pura.
U CMO u la ïathuh ruh ba kino kino kiba wan ban shim ïa ka injekshon pyrshah ïa ka jingpang la ai noh mardor ïa ka injekshon ha Ujhani Community Health Centre.
Na ka bynta kane, la plie ïa ka jaka sumar jong ka Primary Health Centre/Community Centre na ka bynta ka sngi Saitjaiñ bad ka sngi U Blei.
U la ïathuh ba ïa kane ka shnong la buddien kum ka lad jingïada ban ïada na ka jingsaphriang kino kino ki jait khubor hamsaïa ne ka jingtieng jingsyier.
Uwei pat u nongshong shnong u Dharmpal u la ïathuh ba kane ka muid ka la shah dait ha u ksew ba don ïa ka jingpang Rabies bad ka la ïap noh hadien ba ka la kem pang.
Ka jingsheptieng jong ki nongshong shnong ka long ba ki la bam ïa ka jingbam ba la khleh lang da ka dud jong kane ka muid.
