Shillong, Nohprah 29 (UNI)
U Myntri Rangbah ka Jylla, u Conrad K. Sangma, u la pynrem jur halor ka jingshah pynïap jong uwei u samla pule MBA ba dang 24 snem ka rta na Tripura, ha ka nongbah jong ka Uttarakhand, ka Dehradun.
“U Anjel Chakma na Tripura u la duh noh la ka jingim hadien ba u la mad ïa ka jingshah thombor kaba la mih namar ka jingïakynad beiñ jaidbynriew kaba shyrkhei ha Dehradun. Kane ka long kaba pynpait dohnud bad ka bym lah ban pdiang,” thoh u Sangma ha ka rynsan lad pathai jong u.
“Ym dei ban pdiang da lei-lei ruh ïa ka jingïakynad beiñ jaidbynriew. Ki briew na ka Thaiñ Shatei Lam Mihngi ki dei ki nong India kum lem kiwei pat ki nongshong shnong jong kane ka ri. Ym dei ban pdiang satia ïa ka jingbeiñ jaidbynriew, bad dei ban pynshitom ïa ki nongleh kam sniew,” la pynskhem u Myntri Rangbah.
La kynnoh ba u Anjel u la shah thombor da ka tiar kaba nep ha ka jingïa-ka-jia kaba khluit bha bad ka kynhun jong kumba 5-6 ngut ki briew ha ka jaka bam (Canteen) ha ka 9 tarik u Nohprah bad hadien kata, u la khlad noh namar ki jingmynsaw jong u ha ka 26 tarik u Nohprah ha kawei ka ‘hospital’ shimet.
Na ka liang u Myntri Rangbah ka Uttarakhand, u Pushkar Singh Dhami ha ka Sngi U Blei u la ong ba kum kine ki kam thombor ki long ki bym lah ban pdiang satia bad pyntip ba la kem ïa 5 ngut kiba suba donkti ha katei ka jingjia.
Uwei na ki suba donkti ha katei ka jingpynïap ïa u Anjel, uba la tip kyrteng kum u Yagya Awasthi, uba dei u nongshong shnong ka Kanchanpur distrik jong ka Nepal bad u dang phet rieh haduh mynta.
Ki pulit ka Uttarakhand ki la pynbna ruh ban ai khusnam T.25,000, na ka bynta ka jingkem ïa u Awasthi, wat haba ki kynhun pulit ki don ha Nepal ban thwet bad buddien ïa u.
