Shillong, Nohprah 29
U Symbud Myntri Rangbah ka Jylla uba peit ïa ka tnad kam pohïing, Bah Prestone Tynsong u la pyntip ba u Myntri ka tnad kam pohïing ka Sorkar Pdeng, u Amit Shah, u la ai ïa ka jubab kaba “bha shi kat dei” halor ka jingtyrwa jong ka Jylla ban pynïar ïa ki lad jingïada kiba kum ka Inner Line Permit (ILP) sha ka Jylla, lyngba ka ‘Immigration and Foreigners Act 2025’ kaba dang shu dep ban pynlong aiñ shen.
Ha ka jingïakynduh ba dang shen bad u Myntri ka tnad kam pohïing ka Sorkar Pdeng ha New Delhi, u Bah Tynsong u la ong ba ka kynhun na ka Jylla hapoh ka jingïalam u Myntri Rangbah, u Conrad K. Sangma ka la pynsngew ïa katto-katne ki mat, kynthup ïa ka saiñdur jong ka ILP bad ka aiñ thymmai jong u snem 2025.
U la batai: “Ngi la ïakren kumno ngi lah ban pynïasoh lang ïa ka ‘Immigration and Foreigners Act, 2025’ bad ka kyndon kaba long kum ka ILP, ka ban treikam kum ka ILP na ka bynta ka Meghalaya. Ka jingïakren bad u Myntri kam pohïing ka Sorkar Pdeng halor kane ka long kaba manbha shibun. Ka lah ban long ba ha ka taïew ban wan, u Secretary ka tnad kam pohïing ka Sorkar Pdeng un sa lum jingïalang bad u Chief Secretary lem bad ka Director General of Police (DGP) ban pynbeit ïa ki rukom treikam ha ban pynbna ïa ka Meghalaya kum ka jaka kaba don jingïada ne kaba la pyrkhing katkum ka aiñ kaba thymmai.”
U Bah Tynsong u la batai bniah ba kane ka jingthmu pynkylla kan bsut ïa ka kyndon kaba ïasyriem bad ka rukom treikam ka ILP, ka ban pynlah ïa ka Jylla ban dawa ïa ki briew kiba nabar-ki nongshong shnong ka ri India bad kiba nabar-ri kumjuh-ban ïoh ïa ka jingbit hashuwa ban rung sha Meghalaya.
U la kdew, “Hapoh ka ‘Immigration and Foreigners Act, 2025’ bathymmai, ngi thmu ban pynrung ïa ka kyndon kaba ïasyriem bad ka ILP ban thaw ïa ka jaka ka ban ïoh jingïada ne jingpyrkhing, ka ban ai bor ïa ka Jylla ban ai jingbit ïa ki briew kiba nabar hashuwa ba kin rung, kumba la leh ha Arunachal Pradesh. Kino-kino kiba wan sha ka Jylla katkum kane ka aiñ kin hap ban pynrung kyrteng ‘Online’ lyngba ki ‘Facilitaion Centre’ ha ki jaka rung.”
U la bynrap ruh ba kane ka aiñ kaba thymmai kan kham treikam bha ban ïa ka ILP (kaba mynta) ha ka ban ïakhun pyrshah ïa ka jingwan buhai shnong be-aiñ, khamtam haba buh jingmut ïa u pud u sam jong ka Meghalaya bad ka Bangladesh uba jrong haduh 444 kilomitar.
Haba kylli hato ki kynhun kiba pyrshah ïa ka jingwan rung kyrthep kiba nabar kin pdiang ne em ïa kane ka jingtyrwa, u Bah Tynsong u la jubab, “Mano ban ym pdiang? Ka jingshisha ka long ba kane ka jingtyrwa bathymmai ban pynrung ïa ka mynsiem jong ka ILP ha ka ‘Immigration and Foreigners Act’ kan kham khlaiñ bor bad treikam bha ban weng ïa ka jingeh jong ka jingwan rung kyrthep bad ka jingwan buhai shnong be-aiñ sha ka Jylla.”
U Symbud Myntri Rangbah u la kdew ba ka sienjam kaba bud ka kynthup ïa ka jingïalang hapdeng u Secretary ka tnad kam pohïing ka Sorkar Pdeng bad u Chief Secretary bad DGP ka Jylla ban pynbeit ïa ki jingtreikam.
U la ong, “Lada ka Sorkar Pdeng ka mynjur ban pynrung ïa kane ka kyndon, ka ‘Immigration and Foreigners Act’ kan treikam kum ka ILP na bynta ka Meghalaya. Lada ka jingtyrwa ka long kaba lah ban pdiang, yn ym donkam da kawei pat ka aiñ; ngi lah ban pyntreikam pura ïa ka ‘Immigration and Foreigners Act’ ha ka jaka ka ILP.”
Katkum ka jingong jong u, kane ka jingtyrwa, lada mynjur, kan ai bor ïa ka Meghalaya ban pynbeit ryntih ïa ka jingrung jong ki bar-ri bad ki nongshong shnong ka ri India, ha kaba kan long kaba donkam eh ïa ki ban pynrung kyrteng haba ki wan poi.
