Shillong, Nohprah 29
Ka Hynniewtrep Integrated Territorial Organisation (HITO) ka kyntu ïa u Chairman ka North East Democratic Alliance (NEDA) bad Myntri Rangbah ka Assam Himanta Biswa Sarma ba un dawa ïa ka Sorkar Pdeng ba kan pyntreikam noh ïa ka Inner Line Permit (ILP) ha baroh ki Jylla ka thaiñ Shatei Lam Mihngi ( North East).
“Ngi kyrpad ïa phi da kaba burom, ha ka kyrdan jong phi kum u Chairman ka NEDA, ba phin ïalam na khmat ha ka ban dawa pyntreikam ïa ka ILP hapoh ka Bengal Eastern Frontier Regulation, 1873 ha baroh ki Jylla ka thaiñ Shatei Lam Mihngi” ong u President ka HITO u Bah Donbok Dkhar ha ka dorkhas ba la phah sha u Himanta Biswa Sharma ha ka sngi Nyngkong.
Shuh-shuh u la pynpaw ba, ka ILP ka dang treikam tang ha ki san tylli ki Jylla jong ka thaiñ Shatei Lam Mihngi ka Ri, kata ka Arunachal Pradesh, Nagaland, Mizoram, Manipur bad Sikkim.
“Haba peit ïa ka long ka man ba mynta, ka long kaba donkam ban pyntreikam noh ïa ka ILP ha ka Jylla Meghalaya bad Jylla Assam ruh, khnang ba kan ïada ïa ki trai ri trai muluk, ïa ka khyndew ka shyiap jong ki, ka jinglong ba kyrpang bad ka kolshor ba hiar pateng. la ong u Bah Donbok.
Shuh-shuh u la ong ba ka ILP kam dei ka lynti ba pura ban khanglad ïa ka jingwan rung kyrthep ki mynder, hynrei ba kan long pat ka lad ban pyrkhing, ban peitngor bad tehlakam ïa ka ïaid ka ïeng ki mynder ri hapoh ka thaiñ lam mih ngi baroh kawei.
Ka HITO ka la pynpaw ruh ïa ka jingsngewkhia halor ka jingkynthoh ba dang shen da u Nongïalam ka Sorkar ba shipor ka Ri Bangladesh u Muhammad Yunus, u ba la kam ba ka Bangladesh ka dei tang ma ka, ka nongri nongsumar ïa ka duriaw na ka bynta ki hynñiew tylli ki Jylla ka thaiñ Shatei Lam Mihngi haba kdew ïa ka Silliguri Corridor.
Haba pynpaw ïa ki jingbym skhem ka synshar khadar ha Bangladesh bad ka jingïai ïoh kem ïa ki nong Bangladesh ba rung be-ain na ki Jylla ka thaiñ Shatei Lam Mihngi, kane ka Seng ka la maham ba ka jinglong jingman ka pynmih ïa ka jingsngewkhia kaba jur halor ka jingsngaiñ, ka jingdon ki paid bynriew bad kiwei kiwei ha ka thaiñ.
