Shillong, K’Lyngkot 04
Kawei ka ïing jong ka Kong B.Marbañiang kaba don ha ka Shnong Umlyngka, Dong Mission, ka la ingkhong khait ha ka jingpluh ka ding.
Kane ka jingjia kadei kaba la jia ha ka por kumba 5:15 janmiet jong ka sngi u Blei, ka 04 tarik u Kyllalyngkot 2026.
Katkum ki khubor la ïoh jingtip ba ha katei ka ïing la don lai tylli ki kamra jong kiba sah wai, hynrei ha kane ka sngi kim shym la don mano-mano hapoh ka ïing, namar kiwei kiba shongwai ha ka tei ka ïing ki dang leit shnong bad u wei pat u dang mih leit sha dukan.
Ha katei ka jingjia ym shym la don mano-mano ba mynsaw, lait noh tang ka ïing kaba la ingkhong lut khait baroh bad ym shym la ïoh sei wat tang kawei ka tiar ruh namar la jur palat ka jingkem ding.
Hadien ba la ïoh jingtip halor kane ka jingjia ki paidbah nongshong shnong ki la wan kyrkieh sha katei ka jaka ban ïarap pynlip ïa ka ding kaba klang da kaba rah ruh ïa ki borti um. La wan poi ruh ki kali kit um kiba la lah ban pynlip ïa ka ding bad ban khanglad ba ka ding kan nym pur sha kawei pat ka ïing kaba buh ïa ki khaw rashon.
Kumta ha kapor kumba 6 duna eiei ka kali pynlip ding ka la wan poi mar-mar ha katei ka jaka bad la lah ban pynlip pura noh ïa ka ding kaba dangmeh.
Haba kylli na u Rangbah Shnong u Bah Staphen Lyngdoh u la ïathuh ba ka daw jong ka jingjia pluh ka ïing ka lah ban dei na ka bording elektrik namar naduh mynstep ka la don ka jingthud ha ki wire, hynrei ym shym la poi pyrkhat ba kan jia haduh kattne haduh ba ka ïing ka la ingkhong khait.
Ha kane ka jingjia la don lang ki nongïalam shnong, ba kynthup ïa u Bah Staphen Lyngdoh, u Bah Trikilak Lakiang bad u Bah Leofast Majaw.
