Nongstoiñ, K’Lyngkot 04
Ha ka sngi Saitjaiñ jong ka taiew ka Hynñiewtrep Youths’ Council (HYC) Rambrai Circle ki la hiar sha ïew Rambrai ban lum thup bad ban kit ïa u ñiut ba la ieh sah la bun bun snem ha kane ka ïew bad ban leit theh pat hakhmat ka ophis u Syiem ka Hima Rambrai.
Ka HYC ka la pynïaid shakhmat ïa kane ka kam hapoh ka jingïalam u President Bah Drowel Lyngdoh Mawdoh bad General Secretary samla Kwahsisjune Nongphud ryngkat ki nongïalam bad dkhot ka HYC Rambrai Circle bad ha ka jingïadonlang u samla Lumlang Kharsyiemlieh President ka HYC West Khasi Hills District.
La ong ba ha katei ka sngi la wan u Syiem ka Hima u Paiem O Syiemsad, ha kaba u la ong ba ka Hima kala dep shimkhia bad ban kit pynkhuid noh ïa u ñiut ha ïew Rambrai, ha kaba ka la mih ruh ka jingïañia ba jur.
Ki nongïalam ka HYC ki la ong ba katei ka jingieh ïa ki ñiut ki ñier ha katei ka ïew hapoh ka jingpeit u Syiem ka Hima Rambrai kala ktah ruh ïa ka rong ka rup jong ka ïew Rambrai bad khamtam kaba ktah ïa koit ka khiah jong ki paidbah nongshong shnong bad ruh ïa ki nongshong ïew.
La ïathuh ruh ba ka HYC Rambrai Circle ka la buh ïa ki jingujor la man ki por ïa ka jingdon jong u ñiut ha katei ka jaka bad ym tang ka HYC hynrei kiwei ki para nongïalam sengbhalang ruh hynrei imat u Syiem um patiaw ïa katei ka jingeh ki paidbah.
U Bah Drowel Lyngdoh Mawdoh u la ong, ka seng ka la leit ban ïakynduh ïa u Syiem Rambrai ban dawa ban kit noh mardor ïa u ñiut kaba la i saitmet shisha haba peit bad la ong ruh ba ka seng ka la buh por ïa ka ophis jong u Syiem ba un pynkhuid noh kloi kloi hynrei na ka liang u Syiem u la sngap mynthi kumta ka seng kam banse ban khat noh da lade bad ban leit bret shisyndon ha phyllaw ka ophis jong u khnang ba u Syiem ka Hima Rambrai un sngewthuh ïa ka jingjynjar kaba ki paidbah ki mad la baroh shikata.
Ka seng lyngba u President ka kren shai ba kane ka dei tang ka dak hynrei lada u Syiem u dang sngap mynthi kam banse ban shim sa da kiwei pat ki sienjam kiba kham tyngeh.
U Bah Drowel u ong ba na ka daw ka jingmynthi u Syiem, ka seng ka la leit theh ïa utei u ñiut na ïew Rambrai bad lada dang ïai mynthi kan sa pyrkhat kumno yn leh bad lada u Syiem un pynkhuid noh ïa u ñiut ha ïew Rambrai, ka HYC Rambrai Circle ka long kaba la kloi ban pynkhuid noh ïa ñiut ba la theh ha phyllaw ka ophis u Syiem.
Shuh shuh ka HYC kala pynpaw da kaba ong, pynkhuid shuwa ïa u ñiut ha ïew Rambrai bad kan sa wan pynkhuid noh ïa u ñiut hapoh ka ophis jong u Syiem.
