Shillong, K’Lyngkot 04
Ka Khasi Students Union (KSU) ha ryngkat bad ki paidbah jong ka shnong Dona Skur ki la ïoh bat ïa ar ngut ki nong Bangladesh kiba thmu rung beaiñ sha ka Jylla.
Ha ka jingtohkit kaba bniah la ïoh jingtip ba kine ki nong Bangladesh ki nud ban rung sha ka Jylla da jingdon ar ngut ki dalal ba kynthup u wei na India bad u wei na Bangla bad kat haduh mynta ym pat lap dien satia ïa kine ki dalal.
Ha kyrwoh ba la phah ka KSU ka la pynpaw ïa ka jingsngew lyngngoh ba ka tnad pulit jong ka Umkiang PPP ki lah pyrshang ban khanglad ïa ki nongïalam ka seng ban nym ai khubor bad ki byrthen ba kan neh beit khlem da tip paidbah ïa ka jingrung beaiñ kine ki nong Bangla.
“Kane ka la pynkyndit ïa ka seng bad ka kwah ban buh jingkylli ba hato khlem da pyntip sha ki lad pathai khubor ïa kum kane ka kam kaba buh jingma ïa ka ri bad ka jaidbynriew la pyrshang da ka tnad pulit hi ban khanglad ban thad paidbah,” ka la ong .
Ka KSU ka buh jingkylli ruh ba ka tnad pulit ka don bynta lang seh mo ban long ki dalal ban pynrung ïa kine ki nong Bangladesh? Da kaba kynnoh ruh lada ka ïai long sah kumne ka mut ba lah bun bah kiba lah rung beaiñ da ka jingïarap jong ki pulit.
